Van de Schelde tot de Weichsel. Deel 2: Neder-Duitschland

[p. 395]

De Heer un syin Knecht. (Sauerland.)

Kauert⁽¹⁾ was de Heer, un Koierken⁽²⁾ was de Knecht. Kauert kummandäierde nit viel, un Koierken paräierde nit viel; denn sai machten te viel Kumpanigge byim Schnapsglase, un de Schnaps, dat wiet yi alle; mäket Heer un Knecht glyik. Des Owends hadden sai gewünhlik baide de Kraune⁽³⁾ vull, un duselden dann sou schlackerbäinig op iäre Schlopkabuisken, dat sik de Äine üwer den Andern schüppede. An der äinen Wand hadde Kauert syin Külter⁽⁴⁾, un an der andern Koierken. Niu krawwelden sai sik äines Owends auk mol imme schoinsten Schrüf⁽⁵⁾ in iäre Bedde un fengen an te schnuarken, ase wann de Sagemühle genge. Uemmen Tyit raip Kauert: ‘Koierken!’ - ‘Heer! battann⁽⁶⁾?’ - ‘Koierken! myi dücht, et trekket up der Kamer.’ - ‘Heer! dat dücht myi auk;’ un sai schlaipen födder.

Nit lange, do raip Kauert: ‘Koierken!’ - ‘Heer! battann?’ - ‘Koierken! myi dücht, dat Fenster stait uappen.’ - ‘Heer, et dücht myi auk!’ Koierken bläif leggen, un sai schlaipen födder.

Nit lange dernoh do hett' et wier. ‘Koierken!’ - ‘Heer! battann?’ - ‘Koierken! myi dücht, et wür mal gutt, wann dat Fenster tau wör.’ - ‘Heer, et dücht myi auk.’ Koierken awer bläif ruhig leggen un rüppelde un roierde sik nit; un sai schlaipen födder.

Endlik raip Kauert: ‘Koierken! mak dat Fenster tau!’ Füär saume Kommando kraïg Koierken den Frochten⁽⁷⁾, sochte syine Baine iut dem Strauh, stont op un machte dat Fenster tau. Hai krawwelde an der Wand rümme un kraup wier in 't Bedde; of hai in 't richtige kam, wäit ik nit; un sai schnurkeden wier no Nauten.

Awwer nit lange, do fenk Kauert ganz angesthaft an te raupen: ‘Koierken, Koierken!’ - ‘Heer, o Heer! battann?’ - ‘Koierken! et liet en Keerel in myime Bedde!’ - ‘Heer! in dem myinen auk!’ - ‘Ik schmyite den myinen deriut!’ - ‘Un ik den myinen auk!’ - Un jeder fenk an, sik met syime Keerel te frasseln, un dat gaffte en Sparteln imme Bedde, dat de Lakens rieten un det Strauh rümme flaug. Op äinmal gafft' et 'ne Knall, dat de Bühn⁽⁸⁾ biusede, un Kauert raip: ‘Oh! Koierken! oh! Koierken!’ - ‘Heer! o Heer! bat is?’ - ‘Oh! Koierken! myin Keerel hiät mik iut dem Bedde schmieten!’ - ‘Heer! un ik hewwe der den myinen riuter schmieten.’

Ase de Sunne all hauge stont un de Ziegenhäire⁽⁹⁾ blais, do kam de Klainknecht op de Kamer un woll den Heeren wecken, un verwünderde sik in den Daut, dat Kauert füär dem Bedde laggte, un Koierken derinne, un dat det andere Bedde lieg was; un dai baiden riewen sik de Augen un de Blesse⁽¹⁰⁾, un verwünderden sik auk, un konnen gar nit bigryipen, biu dat taugohn was. Ik gloiwe awer, bai myi andächtig tauhoort hiät, dai kann't sik an den fyif Fingern aftellen.

F.W. Grimme.

(1) Kauert, Conrad.

(2) Koierken, Conrädchen.

(3) Kraune, Kopf.

(4) Külter, Bettkasten.

(5) Schrüf, Rausch.

(6) Battann, was denn.

(7) Frochten, Furcht.

(8) Bühn, Fuszboden.

(9) Ziegenhäire, Ziegenhirt.

(10) Blesse, Stirn.