Van de Schelde tot de Weichsel. Deel 2: Neder-Duitschland

[p. 298]

An mine Jung's. (Stralsund.)

Ik harr drei lütte Bengels;
Wo was dat Glück so grot!
Sei wier'n min Ein un Allens -
Nu is de Oellste⁽¹⁾ dod.

Ik hew em sülwsten graben⁽²⁾,
Hew nich vel rohrt⁽³⁾ un klagt,
Un doch - sit dit müszt kamen,
Is mi de Kopp begragt⁽⁴⁾.

Nu liggt 'e⁽⁵⁾ vele Milen
Von mi in kolle Ier⁽⁶⁾,
Ik kann em nich vergeten,
Hei fehlt ball dor, ball hier.

De Twei sünd mi noch bleben⁽⁷⁾,
De Grot so rod un drall⁽⁸⁾,
Blag' Oegings⁽⁹⁾, gele⁽¹⁰⁾ Locken;
De Lütt so witt un small⁽¹¹⁾.
Un abends, wenn dat schummert⁽¹²⁾,
Nehm ik sei up den Schot,
Den Lütten möt'k noch stütten,
Un riden deit de Grot.

Dat Lütting grint⁽¹³⁾ un nörrickt⁽¹⁴⁾,
De Grote redt all mit,
Un makt sovel' Mafäuken⁽¹⁵⁾,
Dat hei noch runnerglitt.

Denn möt ik ludhals'⁽¹⁶⁾ lachen,
Un ward uk werre Gör;
Un doch - dörch all dat Hägen⁽¹⁷⁾
Dor klingt ein Rup⁽¹⁸⁾ hendör⁽¹⁹⁾,

Dei klingt ut wide Fiern
So trurig, dat ik wein:
‘O kumm doch, leiwes Vading⁽²⁰⁾,
Ik ligg hier so allein!’

Oswald Palleske.

(1) Oellste, Aelteste.

(2) Graben, begraben.

(3) Rohrt, geweint.

(4) Begragt, grau geworden.

(5) 'E steht für hei (er), aber auch für dor, der (da).

(6) Ier, Erde.

(7) Bleben, geblieben.

(8) Drall, gedrällt, daher rund.

(9) Oegings, Aeuglein.

(10) Gele, gelbe.

(11) Small, schmal, schmächtig.

(12) Schummert, dämmert.

(13) Grint, lächelt.

(14) Nörrickt, räuspert, hier der unartikulirte Laut kleiner Kinder.

(15) Mafäuken, Wippchen, dummes Zeug.

(16) Ludhals', aus vollem Halse.

(17) Hägen, Freude, Ergötzen.

(18) Rup, Ruf.

(19) Hendör, dör, dörch: durch.

(20) Vading, Väterchen, dem. v. Vader.