Van de Schelde tot de Weichsel. Deel 2: Neder-Duitschland

Hamburg.

Ein Geschicht von den Hamborger Ewerfahrer⁽³⁾ Krischan Wehnke.

Wehnke kümmt tau Wettern up den Steinweg in dei Winstuw. ‘Gauden Morgen, Krischan!’

Wehnke. Gauden Morgen, min gaude Jung! Lat mi ein klein Glas Grog von Cognac krigen, ein lütt beten stark, nich tau säut, un ein gauden Zigarr.

Wettern. Sast du glik hebben, min Jung!

Ein Schiffsmakler. Du drinkst all Vörmiddag Grog?

Wehnke. Ein oll Seemann, wie ick bün, is dat gewennt. Gott verdamm! min olle Jung, ick heff vel erlewt, vel Gaudes, vel Schlichtes, bet ick as Hamborger Kind wedder taurügg in min Varerstadt kamen bün.

Dei Schiffsmakler. Ja, du hest vel dörchmakt.

Wehnke. Ick bün grad' nich stolz, min gaude Jung, äwest mennig Senater mit söszdusend Mark kann bi mi in dei Schaul gahn!

Dei Schiffsmakler. Bi Trafalgar, da har 't di äwest schlicht gahn künnt.

Wehnke. Ja, Kinner, dat wir 'n heiten Dag! Awest üm ganz St. Pauli⁽⁴⁾ möcht ick dissen Dag nich hengewen. Des Morgens halwig vier kemen all dei Signalen! Allens in Paradeuniform! All people on Deck! rep ick as Hochbootsmann dei Matrosen tau. Vör uns leg dei ganze türksche un französche Flott in Schlachtornung. Wi haren all duwwelte Rationen fat't un ick sülben har min twei halw Pinten Rum drunken, - nicks spürt, as wenn ick Water sapen har! Äwest nich ut Angst, bewahre, ne, mine Verantwuhrtung wir grot an den Dag. Nelson höl' wat up mi. Wehnke, min Jung, sär hei un kloppt mi up dei Schullern, nu pasz up! God dam, Old England for ever! - Nu güng dat Scheiten los! Hei ümmer up dat Kwaterdeck mit sin Schperfecktik⁽⁵⁾ an 't Og! ‘Backbord - 'Tann! Feuer!’ Bum - Bum! den Franzosen sin grot Mars-Segel kort un klein schaten! ‘Brav Wehnke!’ seggt hei, ‘blifst min olle Hamborger Jung! Steuerbord! Tann! Feuer!’ Bum - Bum! Da springt dei Franzos, einen schönen Dreidecker, in dei Lucht. Wi haren em in dei Pulverkamer drapen, - da sprüngen dei Liken herüm bet up uns' Deck. Ein Leutnant kem grad' up mi tau geflagen ahn

(3) Ewerfahrer Die Ewer sind eine Art Fahrzeuge.

(4) St. Pauli, eine Vorstadt Hamburgs.

(5) Schperfecktik, (Perspectif) Fernrohr.

[p. 237]

den linken Arm un in sülwigen Ogenblick kemen ok twei Bein un ein recht Schuller mit 'n goldnes Epaulett angesus't. Mon Dieu, seggt dei Leutnant ahn⁽¹⁾ linken Arm, je ne me trompe pas, dat is, Gott verdamm, uns Post-Midshipman! föll üm un dod was hei. Ick lat glik nen sack halen, pack den Leutnant da in, dei twei Bein un dei rechte Schuller datau, - geschwind tauneiht - ein sösz un dörtig Pünner datau - bums! Rule Britannia! rünner in 't Water - in 't Seemannsgraff.

Dei Franzosen würren nu wüthend un schriten - man künn't bet tau uns räwer hüren: - Nelson, Nelson! Allens har sin Schperfecktik up uns richt't. - Min Nelsonken - ganz ruhig!

Ick gah ran un segg: Mon Admiral, sei hollen all grad up Sei⁽²⁾.

‘Deit nicks, ick bliw up minen Posten!’

Herr Admiral, ehr Uniform is tau schinig. Gahn Sei na dei Kajüt, ick ward all Allens besorgen.

‘Nicks, Wehnke, ick bliw up minen Posten.’

Herr Admiral, knöpen Sei sick wenigstens dei Uniform tau!

Nicks - Bum! kem 'ne Kardätsch gegen sin witt Pique-West un terret⁽³⁾ sin Heldenhart, - da leg hei!

‘Min armen Kinner! - Wehnke, har ick di hürt,’ dat wiren sin letzten Wührd.

(1) Ahn, ohne.

(2) Sei, Sie.

(3) Terret, zerrisz.