Versamelde gedigte

VII

Kom gee vir my polfyntjie,

Dit maak nie saak nie wat,

Die kleinste, nietigste lyntjie

Waardeer ek as 'n skat.

Koop waar jy wil, by smouse,

Penswinkeltjies, net wat

Jy kry in Krismiskouse -

Dit bly vir my 'n skat.

Net iets wat jy as joue

Betrag het, gee my dit -

Ek neem dit aan as goue

Gesteente tot besit.

En as jy eenmaal sterwe,

Dan pryk dit nog by my,

Gegee meer as geërwe,

As liefdeblyk gekry.