Versamelde gedigte

XI Speelmaats

Kom, tydgenote van my kinderjare:

Die poplierbos met silwergrys, die wyn

Van môrewind, die blomtuingeur wat rein

Soos wierook opstyg deur die boomgaardblare,
Die blou lug bo, die uitgestrekte, klare

Goudson-vergulde veld, die veraf lyn

Waar veld en lug tesaamkom en die skyn,

Soos silwerstrepe, van die reënvol are
Wat water na die see bring, en die vlei

Met eendvoël en flamink, waaroor die waas,

Die blou waas, van die môrehitte rus.

Kom, en herinner my aan die heerskappy

Wat skoonheid steeds besit, dat selfs 'n dwaas

Word in sy twyfel weer tot troos gesus.