Versamelde gedigte

IV Voorbeelde

Soms as allenigheid my moedloos maak,

En van my wegruk broedersteun en trou,

Dan, eer die ooste met die daglig grou,

En die koel maan sy opklim-koers versaak,
Nog voor sy lig die verste vleiland raak,

En die vuurvliegies in die gras verflou

Of glinster op die nuut-geplaste dou

Waaroor die middernag se vrede waak,
Rys voor my op, in droomgestaltes dig,

Die ontelbre siele van die voorgeslag

Wat ook alleen gestaan het om te stry

Vir wat hul reg geag het, eer en plig.

Dan kry ek in my eensaamheid 'n krag

So sterk as ooit 'n sterflik mens kan kry!