Versamelde gedigte

XLIX

Sing, vinkie, sing!
Dis lekker vir jou om te sing
As die son sy sonskyn bring
Om die pad met goud te saai
Waar die wilgertakke swaai
As die koel veldwindjie waai.

Sing, vinkie, sing!
Ek wens maar ek kan fluit
Soos jy, dag-in, dag-uit,
Oor die water, oor die vlei,
Waar die wit aandblompies sprei
'n Blomtuin wit vir my.

Sing, vinkie, sing!
Hier waar jou nessie swaai,
Met vinkietjies belaai!
Leer hulle algar ook te sing

[p. 214]

 

Vrolik en vlot as die sonskyn bring

 

Goud vir die môre en middag. Sing,

 

Vinkietjies, sing!