Versamelde gedigte

[p. 199]

XXII

Die westerson, in wilde vlam,
Op vensterglas en watervlak
Gooi goudgeel reuse-glorievlekke,
Wat lewe as die sonlig sterwe
Op berg en dal en dak.
Die koning van die dag is lam,
Lam van sy wêreldlang rondswerwe;
Moeg van sy magtig' môre-glorie,
Sy middagkrag,
En al die prag
Van die lang skemering-afstanddoen,
Voordat die laaste kleur hom soen
En op sy troon die donker groen
Van nag sy rykdom pak.