Versamelde gedigte

XLII

Lommerryk oor die watersloot hang die wilgertak;

Waggelend op die watervlak dryf die lelieblaar;

Donserig in die waenhuishoek hang die spinnerak;
Vreedsaam oor die ruigte-vlei stap die ooievaar;

Skommelend oor die seekoegat tjilp die vinkeheer:

Louter vreug hou bidstond hier waar die nessie swaai;

Sedig op die plaas se werf - sedig heen en weer -

Kuier, kopknik-slenterwys, in sy skik, 'n kraai.