Versamelde gedigte

[p. 97]

XXXII

Lang braakland-arbeid voor die grond kan teel

Die weelde wat sy diepste heimlik hou;

Lang, smartvol werk voordat die veld ontvou

Sy groen en goud en geel;

Eers doodgaan voor die lewe wat besiel

Die ongespruite saad,

Ootmoedig in die sonskynstraal kan kniel

In geilste groen gewaad;

Eers sukkel deur die smart wat eind'lik baar

Plesier en rein geluk;

Eers ruwe trekke aan die teerste snaar;

Eers sug en buk -

En dan die diadeem, die vol koraal

Wat weerklank gee tot in die sterreryk,

Om nimmer tot 'n klaaglied weg te daal

Voordat die siel beswyk!