Mi lenga. Deel 2

[p. 26]

Di seys lesaant.

Pronòmber:

Tin sinku sorto di pronòmber: Personal, posesivo, demonstrativo, interogativo i relativo.

Pronòmber personal

Un pronòmber personal ta indiká.

1. E persona ku ta papya (mi, ami, nos).

2. E persona ku ta papya kune (Bo, abo, boso, bosonan).

3. E persona ku ta papya di dje. (E, esun, nan, esnan).

E pronòmber ku ta indiká e persona ku ta papya ta un pronòmber di Promé persona.

Algun ehèmpel: Mi ta stima mi mama.

Nos ta respetá nos tata.

Mi wela ta stima nos.

E pronòmber ku ta indiká e persona ku nos ta papya kuné ta un pronòmber di di dos persona.

Algun ehèmpel.

Bo ta un bon hende.

Boso ta masha sabí

[p. 27]

Angela ta stimabo.

Mañan lo mi topa boso.

E pronòmber ku ta indiká e persona ku nos ta papya di dje ta un pronòmber di di tres persona.

Algun ehèmpel:

E ta kumpra brièchi.

Nan ta gusta gaña.

Dos hende a bin buska nan.

Pronòmber posesivo.

Ora un pronòmber ta indiká poseshon, ora e ta indiká algu ta di un persona, nos ta yamé: Pronòmber posesivo.

P e. Mi kas, Bo tera. Su owto. Nos lugá. Boso wega. Nan asuntu. Un buki di bo. E garoshi di dje. E terenu di nan.

Pronòmber demonstrativo.

Un pronòmber demonstrativo ta referí na un sustantivo o na un frase.

Algun ehèmpel:

Disparsé lihe, esei mi ke.

E stul akí ta mahos.

E mesa ayá ta mankaron.

E kama ei falta fèrf.

Esaki ta mi wela.

Esei no ta mi asuntu.

Esaya bal muchu mas.

Esakinan ta e kosnan ku bo a pidimi.

Eseinan no ta di bende.

Esayanan a bay basta ratu kaba.

Esun akí ta bon.

Esun ayá no ta sirbi.

Esnan ku bo tin den kurá.

[p. 28]

Pronòmber interogativo.

Un pronòmber interogativo ta esun ku nos ta uza ora nos ta hasi un pregunta.

P.e.: Kiko (ki') bo ta deseá?

Kwa oloshi bo ta gusta mas?

Ken bo ta buska?

Kende bo di?

Pronòmber relativo.

Un pronòmber relativo ta e pronòmber ku ta relashoná ku un sustantivo o un frase.

Nos ta gosa e hòmber ku ta seryo, esun di ken nos sa ku nunka e ta gaña. Nos ta apresyé pa loke e ta hasi. Un hòmber di ken nos sa kon korekto e ta, semper nos ta apresyá. Fedoi a bay su kas loke ta e mihó kos ku e por a hasi.

Tur e palabranan kursivo den e frasenan aki riba ta pronòmber relativo. ‘Loke’ den e último frase relashoná ku e frase su dilanti. ‘Fedoi a bay su kas’

Ehersisyo

Menshoná den e frasenan ku ta sigi kwa ta e pronòmbernan i ki sorto di pronòmber nan ta

1	Bon manera ta un arma potente; di esei mi ta sigur
2.	Kiko bo di awor ei?
3.	Mi ta kere loke bo ta pretendé.
4.	Carlos tin gana di sa ken ta den klas.
5.	Ami lo ketende algu di e hòmber ku ta papya.

[p. 29]

6.	Señor, poder i glorya ta di bo.
7.	Di ken e kashi aki ta?
8.	Nan ta gusta kome tentalarya.
9.	Boso owto a bòltu mahos.
10.	Bay sinta riba e stul ayá.
11.	Mi no ke esaki, pasobra esaya ta mas bunita.
12.	Kwa kuminda bo ta preferá?
13.	Te ainda mi no sa kiko bo ke.