Mi lenga. Deel 2

(1971)–Pierre Lauffer– rechtenstatus

Di sinku lesaant.

‘Awe nos ta bay siña frakshon’, mener Raul a bisa su muchanan den klas.

El a skirbi riba bòrchi ¾.

‘Esaki ta tres kwartu, o tres kwater parti tambe nos por bisa. E tres ta loke nos ta yama “numerado” E kwater ta e “denominado”

Tres kwartu ta meskos ku tres partí na kwater Nos por skirbyé asina aki’ Mener Raul a skirbi riba bòrchi: 4/3

‘Un ehèmpel mas ta esaki’

‘Den e kaso aki nos ta yama 20 e dividendo. 5 ta e divisor i 4 ta e kosyente

Si bo ta parti 3 na 4, e kosyente ta bira 0 75. Esaki ta un frakshon desimal. ¾ ta un frakshon komun. 0,75 nos ta bisa setentesinku shen parti o skirbí asina. 75/100, loke ta sali meskos ku ¾, pasobra 25 be 3 ta 75 i 25 be 4 ta 100.

Ayera nos a siña multipliká manera boso ta kòrda. Mira kiko mi ta skirbi. Mener Raul a skirbi riba bòrchi 6 × 7 = 42.

‘Kon nos ta yama 6 i 7 den e kaso aki?’

‘Faktor’, henter klas a kontestá.

‘I kon nos ta yama 42?’

‘Produkto’

‘I ora nos suma 5 ku 6, nos ta haña un suma di .....?’

‘Djesun’;

‘Eksaktámente Ora nos buta 5 seka 6, nos ta haña un “suma” Un suma di 11. I ora nos multipliká 5 i 6 ta bira e produkto 30’

Den skol di bida nos ta siña hopi kos ku no ta pará den buki.

Abri un mucha su sintí. (Siña un mucha kon e asuntu ta presis).

Siñansa bal hopi. (Loke ta bisa un mucha, pa e komprondé ku e mester tin un fundeshi di siñansa den su bida). Sintí ta yuda brasa. (Den tur loke bo ta hasi, bo mester uza bo sintí.)

Esaki ta un dicho ku nos por buta banda di ‘Karpinté ta mas ku rey’ E karpinté ku konosé su fishi, tin hopi balor. Semper e por traha, uzando su fishi, pa gana su bida. Pero den fishi tambe mester tin sintí. E karpinté ku no ke pa nan yamé ‘Karpinté di awa dushi’, mester sa kalkulá bon.

Un mucha ku bon kabes por siña ku fasilidat, i un mucha kabes duru ta pasa trabow pa siña.

(Korda bon ku ‘un hende ku mal kabes’ ta un hende ku mal swèltu!)

Kalitu sa su lés fo'i kabes.

Bo kabes no ta pa pyew so kome. (Bo mester uza bo sintí). Su kabes no ta bon (El a skeze o brua. Su kabes no ta parew).

Djo tin sesu (koko). (E no ta kabes vonvin, kabes bashí. E no ta un animal.).

Un hende ku dos dede di frenta. (Hende ku sintí).

Si bo no pasa klas, bo ta keda sinta.

Un mucha hopi spyèrtu por salta klas.

Tin mucha sa stet skol, pa nan bay sinta riba Rif o pa hunga bala.

Esun ku kopya, ta gaña su kurpa.

Si ummucha hasi fèrfelu den klas, e ta haña kastigu. Nan ta buté na rudia o den huki. Si e komete algu grave, nan por duté su ‘papel di ènter’, pa e bay kas.

Wega di mucha.

Nos por hunga kore - kwe, skonde, polis ku ladron, bleki - bleki, tròm, ninichi, bala, subi fli.

Wega di mucha muhe.

Pele, bula kabuya, hila.

Ora nos no hunga sigun e reglanan dje wega nos ta hunga ‘wega di ladron’

Ora skol bedank hopi mucha sa bay pasa vakansi na kunuku.

Vakansi grandi ta vakansi largu (awendia den luna di Juli o agosto).

Un bon maestro meresé un salaryo di sinku mil florin pa luna, maske ta pa su pasenshi di santu.

El a haña sla na su sintí. (Na banda di su kabes, dilanti di orea!!)

Federiko a bira nèrvyoso, te pèrdè sintí. (Bira loko o tolondrá).

Mi ta siñabo! (Lo mi kastigabo, lo mi hañabo).

Numeral kardinal:

Un, dos, tres, kwater, dyes (pero djessinku), den e promé ‘dyes’ nos ta tende un zonido di ‘y’, pero den e di dos ‘djes’ nos ta tende e zonido di ‘dje’!

Binti, setenta (i no ‘shetenta’), shen. treshen, mil, miyon.

Numeral ordinal:

Di promé, di dos, di tres, ets.

Numeral multiple

Dòbel, tripel, kwater be, sinku be, ets.

Numeral kolektivo.

Un par, un doseyn, un gròs.

Numeral indefiní:

Poko, tiki, hopi, algun, mashá, tur, varyos, diferente, un sèt, un stèl, un tow, un grupo, un trupa, un tranzjur, basta.

Ehèrsisyo

1.	Den e frakshon ⅞ nos ta yama e shete ......................
	E ocho nos ta yama ..........................
2.	Kwarenta partí na kwater (4/40 1) ta duna ..................
	4 ta e .........................
	40 ta e .............................
	E resultado di e partimentu ta .....................................
3.	8 × 9 = 72 (Ocho be nwebe ta setentidos).
	Ocho i nwebe ta .................
	72 ta pr ................................
4.	11 + 11 = 22. Djesun ku djesun ta ..........................
5.	Kiko ta nifiká ‘Sintí ta yuda brasa’?
6.	Ki diferensha tin de ‘falta skol’ i ‘stet skol’?
7.	Menshoná algun numeral indefiní.
8.	Un hende ku dos dede di frenta ta un hende .....
9.	Un mucha ku ta pasa trabow pa siña, tin ............
	Un hende ku mashá mal kabes ta un hende ku ..........
10.	Kon lo bo deskribí ‘skol di bida’?

Vorige Volgende