Oeuvres complètes. Tome V. Correspondance 1664-1665

N^o 1308^a.
N. Heinsius à St. Lubienietzki.
7 janvier 1665.

La lettre a été publiée par St. Lubienietzki dans. son Theatrum Cometicum.

Holmiâ Hamburgum die 28 Decembris Juliani 1664.

Dies octavus nunc, ni fallor, agitur, quòd tabellarium sine meis ad Te literis hinc abire in Germaniam sum passus. Erat quippe jam tum Regni Suecici Senatus in rebus proferendis totus: & mihi incumbebat negotiorum nonnihil haud minimi momenti apud illos urgendum, quod ante ferias solemnes expediri oporteret. Quapropter ignoscas aequum est, si Tibi non vacavi illo tempore, quo nec meus eram.

[p. 559]

Cometa ille insignis, cujus postremae tuae¹⁾ meminerunt, cùm paucas apud nos noctes spectandum sese sub matutinas horas praebuisset, comparere mox desiit; evanuitque, sed sic, ut alius illi successisse dicatur. Mihi in rem eam diligenter inquirere hactenus non est datum, ob occupationes, quas dicebam modò, publicas. Iis utcumque defunctus, in dies saltem quindenos, aut vicenos proximos, non intermittam rerum Mathematicarum studiosos ac gnaros percunctari, si quid curiositate tuâ dignum hîc observarunt. Quanquam vix sunt in hac civitate qui signa caelestia prae militaribus curent impensè, aut seriò amplectantur. Upsaliae unum alterumque ex literarum humaniorum Professoribus novi, qui studiis hujuscemodi delectentur haud modicè, ad quos confugiendum esse mihi proposui. Sed dubium non est, quin sagacissimus ille siderum perspector Hevelius vester, qui ingentem hujus argumenti commentarium²⁾, ut scis, jam pridem molitur, quo omnem de Cometis historiam est persecuturus diligenter & doctè, stellae huic crinitae quoque sedulus & solers invigilavit, ut nullum post suam messem spicilegium novae observationis aliis quibuscunque reliquum fecisse videatur. Christianus Hugenius Constantini filius, popularis & amicus meus, tùm disciplinae Mathematicae perquam peritus, patriae nostrae patribus offerebat nuper Longitudinum terrestrium et marinarum abs se inventam apodixin, praemiumque huic invento ab iis positum efflagitabat³⁾. Auguror & precor uberrimum laboris fructum homini amicissimo: sed rebus ego tàm magnis tardissimam habere fidem soleo: cùm meminerim & Wilhelmum nuper Langium⁴⁾, Virum in Dania doctissimum, & alios complures alibi terrarum ejusdem inventi gloriam sibi vindicasse dubio successu. Vale.

1) Elles étaient datées du 20 et du 27 décembre 1664.

2) Voir ses ouvrages, cités dans la Lettre N^o. 1407, note 4.

3) Consultez la pièce N^o. 1278.

4) Sur Wilhelm Lange, consultez la Lettre N^o. 350, note 1. Peut-être s'agit-il ici de son ouvrage:
Exercitationes Mathematicae vii de annua Emendatione et motu Apogaei Solis. Copenhagae. 1653. in-4^o.