Oeuvres complètes. Tome V. Correspondance 1664-1665

[p. 90]

N^o 1246.
[P. Perrier]¹⁾ à Christiaan Huygens.
26 juillet 1664.

La lettre se trouve à Leiden, coll. Huygens.

Jay eu bien de la joye d'auoir receu de vos nouuelles²⁾, Et des asseurances que vous me faictes la grace de me donner de la continuation de vostre amitié, je vous puis asseurer que vous ne la scauriez accorder a personne qui l'estime, et qui la souhaitte plus que moy, je ne vous en diray pas daduantage de peur de manquer a ce que nous nous sommes promis, je vous escritz donc sans façon.

La Chaize³⁾ est plus en vogue que jamais, l'on en connoist presentement l'vtilité, Et l'on est detrompé de la pensée que lon auoit que le Cheual se fatiguoit trop, de la maniere que lon en vse il nen faticgue pas plus qu'un Cheual descellee. Car la plus part des gens menent la Chaize eux mesmes ou la font mener par vn homme a cheual qui mene a coste de luy par vne longe, le cheual qui traisne sa Chaize, Cela est tout a faict commode. Monsieur le Comte de Soissons⁴⁾ va auec trois Cheuaux de Fontainebleau a Paris en moins de quatre heures ou jl y a huit postes, jl mene sa Chaize luy mesme, jl faict coure vn page deuant luy, presentement toutes les personnes de la Cour en demandent, Lon faict les Roües plus haultes, Elles sont de trois piedz et demy de haulteur, Lon met a cette heure lepoisseur des mortaises des brancardz en dessus a cause des fautes qui se faisoient a quelques vns. Et par ce moien le fil du bois n'est point couppé par dessoûbs ce qui faisoit le mal. Le fils⁵⁾ de Monsieur le Tulier⁶⁾ a faict faire des Roues a lordinaire dont les moyeuxs ont dix poulces de long auec vn essieux de fer. Jl sen trouue fort bien, Jl y a deux jnconueniens l'vn que cela adjouste du poidz, lautre que la voye est

1) Sur l'auteur de cette lettre, consultez la Lettre N^o. 1253.

2) Nous ne possédons pas cette lettre de Chr. Huygens à Pierre Perrier, marquis de Crenan.

3) La machine Roanesque. Consultez, entre autres, la Lettre N^o. 1229.

4) Eugène Maurice de Savoye, comte de Soissons, fils puîné de Thomas de Savoye, prince de Carignan, et de Marie de Bourbon, naquit à Chambéry le 3 mai 1635 et mourut le 7 juin 1673 en Champagne. Il fut lieutenant-général et remplit souvent des missions diplomatiques.

5) Peut-être:
Charles-Maurice Letellier, fils puîné du suivant: il naquit à Turin en 1642 et mourut à Reims le 22 février 1710. Après avoir beaucoup voyagé, il devint en 1668 coadjuteur de Barberini, archevêque de Reims, et lui succéda en 1671. Il avait beaucoup d'influence en affaires ecclésiastiques et légua sa bibliothèque de 50,000 volumes à l'abbaye de Ste. Geneviève.

6) Michel Letellier naquit le 19 avril 1603 et mourut en 1685. Il devint conseiller au grand conseil, en 1631 procureur du Roi au Châtelet, maître des requêtes, en 1641 secrétaire d'état au département de la guerre, charge dont en 1666 Louis XIV, tout en le retenant en fonction, donna la survivance à son fils Louvois. En 1677 il fut nommé chevalier et garde des sceaux.

[p. 91]

de demy pied plus large ce qui ne se peut euiter sy lon veut conseruer la largeur du brancard par derriere qui est necessaire ainsy que je pense vous en auoir dit la raison, Et jl y auroit vn autre moien qui seroit de ne faire pas les moyeux de dix poulces de long. Mais cela ne vaudroit rien selon mon aduis Car la roüe balloteroit trop dans l'eesieux. Les moyeaux des carrosses ont quatorze poulces de long. dans les pays des plaines Cette voye de demy pied plus large n'jncommoderoit pas, mais dans des chemins creux cela seroit fort jncommode L'on Met des boüettes de fonte dans les moyeux dans quoy lessieux de fer tourne. Ilz pretendent que cela neüsse pas; aux Charettes lon ny met rien, le fer est contre le bois, Et pretendent que cela neüse quasy point. tous ceux de la Cour veullent de ces sortes de Roües par ce quil est arriué a vne Chaize que lessieu cest dettaché du moyeux de la roue, ainsy quil estoit arriué aux premieres roues que l'on auoit faict faire. Cet accident vient par la fripponnerie du Charron qui ne faisoit que de simples tolles, ces fers qui couurent l'essieux et le moyeux. L'on faict presentement ces fers espoix de prest de deux escus blancz Et l'on met vne cheuille de fer au trauers du moyeux Ce qui empeschera que l'essieux ne se puisse tordre. L'on a Esleué la Chaize de trois poulces plus hault quelle n'estoit Et lon a racourcy leschalleau par dessoubs de quatre poulces, sy bien quil ny a qu vne barre par dessoubs Et l'on en a mis vne autre par dessus les pieces, L'on na point Rogné ses deux gros morceaux de bois sans quoy les barres de l'eschalleau sont en mortaizées. Ils sont de quatre poulces plus hault au dessus des pieces quil estoient, Ce qui faict qu'on peut attacher les pitons plus loing l'un de lautre que l'on ne faisoit, ce qui tient les quenouilles de deuant beaucoup plus fermes. Madame la duchesse dorleans⁷⁾ a demandé vne Chaize pour enuoyer a la Reyne dangleterre⁸⁾.

Pour la pensée que vous auez de faire vne Cariolle douce je ne croy pas que lon en puisse venir about quand mesme vous auriez vn ressort fort lent Ce que je croys qui se peut faire, mais vous ne scauriez esuiter que quand les Roues tomberont d'vne haulteur que vous qui estes de dans la cariolle ne fassiez deux fois l'espace que vous feriez dans vn Chariot qui seroit de la mesme haulteur. Cest ce qui faict que la Cariolle sera tousjours rudes. Et les mouuemens qui sont aussy a droit et a gauche sont aussy du double de ceux d'vn Chariot. outre cela sest aussy que la Cariolle est fort versante.

Pour les ressorts a la Circonferance de la Roüe je conçois comme vous que cela ne vault pas grand choze, jay bien de l'jmpatience de scauoir sy vostre nouuelle jnuention d'aurelosge aura bien reussy je vous prie de men mander les particularitez.

Je suis plus que personne du monde vostre tres humble seruiteur je croy que je

7) Harriet Anne d'Angleterre, appelée ‘Madame.’

8) Henriette Marie de France, mêre de la précédente.

[p. 92]

n'ay que faire de signer mon nom pour vous faire entendre qui vous escrit, ne me faictes dont plus de Ceremonnies comme vous mauez promis.

Ce 26^e Juillet 1664. a paris.

Monsieur de Sallo⁹⁾ Conseiller de la Cour de parlement souhaicte auoir Correspondance par toute lEuroppe pour scauoir des nouuelles des Choses qui se passent tant de ce qui concerne des affaires d'estat que ce qui regarde les sciences. Il Ma priè de vous escrire pour vous prier de trouuer bon quil ait commerce auec vous sur cela, cest vne personne de merite, et de consideration

A Monsieur Monsieur Chr. Hugens de Zulichem a Lahaye en hollande.

9) Denis de Sallo, seigneur de la Coudraye, fils du conseiller Jacques de Sallo, naquit en 1626 à Paris, où il mourut le 14 mai 1669. Nommé en 1652 conseiller en la grand' chambre, en succession de son père, il s'occupa surtout de littérature. Il fonda le ‘Journal des Scavants,’ dont le premier numéro parut le 5 janvier 1665, et qu'il publia à partir du 30 mars 1665 sous le nom de ‘Sieur de Hédouville;’ au 13e numéro, le privilège lui fut retiré, sur une dénonciation de la Cour de Rome; il mourut fort endetté. Le 4 janvier 1666 le journal fut repris par l'abbé Gallois, puis continué en 1685 par l'abbé de la Roque, et de 1687 jusqu'en 1702 par le président Cousin. Huygens a été successivement en relation avec ces divers rédacteurs.