Oeuvres complètes. Tome I. Correspondance 1638-1656

N^o 225.
W. Brereton à Christiaan Huygens.
23 juin 1655.

La lettre se trouve à Leiden, coll. Huygens.

Nobilissimo & Praestantissimo Viro Christiano Hugenio, Gulielmus Breretonius S.P.D.

Quod te frequentioribus literis non salutaverim, sed per tres hosce postremos annos¹⁾, incultam nostram amicitiam reliquerim, in causâ, hoc fuit, Mathematicorum nempé nostratium altum quasi silentium, undé nihil quod tibi gratum esset ad manûs meas pervenit; neque defectum istum ex propriâ penu supplere potui; quum ob alia negotia, eaque nimium necessaria, mihi non licuit tantum Divae Mathesi cultum praebere, quantum illa postulat. Jam veró quum duas nactus sim novas circuli quadraturas, utramque ad te mittendam censui; ut ex te posteá intelligam, an harum autores feliciores evaserint magno illo & prolixo Jesuitâ²⁾, quem hâc in parte, sco-

1) Voyez la Lettre N^o. 123 du 29 mars 1652.

2) Gregorius à St. Vincentio.

[p. 334]

po suo excidisse, iamdudum demonstrâsti. Hoc tamen omninó moneri te oportet, quod Hobbius, iam post impressum librum³⁾; quadraturae suae non tantum tribuit, quantum in ipso libro. Neque ipsi displicet, si quid ipsi, placidé & solidé opponatur; verum Sciolorum obtrectationes & frivolas responsiones vix lectu dignas putat.

Fratres tuos Ludovicum & Philippum, unâ cum Eyckbergio & van Leuwen, vt meo nomine salutes, rogo, & quod reliquum est cum me Vale.

Londini, Junij 13/23 1655.

Si quando ad me rescribere tibi libuerit, literae (si videbitur) hoc modo inscribantur.

For William Brereton Esquire,

Leave these with Mr. John Tailor

a Silkman at the white-horse

in Laurence-lane in London.

et mihi vicissim (si placet) scribas quomodo ad te postea mittendae sunt literae^a).

Nobilissimo & Praestantissimo Viro Christiano Hugenio.

Hagae Comitis.

3) On retrouve ce traité sur la quadrature du cercle dans l'ouvrage publié plus tard:
Thomae Hobbes Malmesburensis Problemata Physica. De Gravitate Cap. i. De Aestibus Marinis Cap. ii. De Vacuo Cap. iii. De Calore et Luce Cap iv. De Duro et Molli Cap. v. De Pluvia, Vento, aliisque Coeli versatilibus Cap. vi. De Motuum Specibvs Cap. vii. Adjunctae sunt etiam Propositiones duae de Duplicatione Cubi & Dimensione Circuli. Londini. Apud Andream Crooke in Caemiterio D. Pauli sub Signo Draconis Viridis. 1662. in-8^o.

a) Incluserat his literis idem folium J. Wallisij quod in literis autoris inuenies. [Chr. Huygens.]