Latijnse gedichten 1607-1620

[p. 62]

(54 Vidua quaedam, ex Petronio arbitro (Vervolg))aant.

defunctus? Debent te coniugis ora monere.’
Tandem igitur frangi passa est matrona, sed aegre,
duritiem viresque cibo revocavit inanes.

Porro blanditiis quibus impetravit ut esset

miles, conubium viduae poscebat eisdem.
Nec contradixit mulier dicente subinde
ancilla: ‘Placitone etiam pugnabis amori?
Nec venit in mentem quorum consederis arvis?’
Quid multis? Victor miles persuasit utrumque.
Ergo istic una taedas fecere iugales
praeclusis foribus monumenti, ut quisque putaret
tristitia exstincti viduam exspirasse mariti.

Ergo ut laxatas latronis nocte parentes

videre excubias, tacite abripuere cadaver
ex furca pendens et mandavere sepulchro.
At circumscriptus miles dum desidet, unam
ut vidit furcam sine corpore luce sequenti,
uxori narrat veritus persolvere poenas
pigritiamque suam gladio se velle punire,
si modo fatalem tumulum concedere vellet.
Dixit, at illa: ‘Nec hoc permittant numina! Furcae
figere defunctum quam vivum occidere malo!’
Tolli ergo ex arca defunctum morte maritum
et vacuae affigi furcae matrona iubebat.

1609.