Briefwisseling van Hugo Grotius. Deel 5

2102. 1635 mei 16. Aan L. Camerarius¹¹.

Illustrissime Domine,

Ruptis jam inter Gallos Belgasque commerciis vetus literis nostris iter simul praeclusum est; itaque rapiendae qualescunque scribendi occasiones, qualis nunc mihi sese offert a Gallo nobilissimo juvene ad Batavicam militiam se referente¹².

11 Copie Uppsala, UB., cod. 388a, Ep. 10. Gedrukt Epist., p. 148.

12 Niet geïdentificeerd.

[p. 482]

Addidi et ad maximum cancellarium¹ literas, quem Rhotomago ad Batavicarum navium adventum Diepam venisse intellexi² quidem, sed an vento adhuc repugnante mari se praesertim non tuto ab hostibus sit commissurus, dubito. Certe quin vocantibus se Germaniae rebus quam salvis prudentiae regulis primum fieri potest, adesse cupiat, dubitare non licet.

Gallorum exercitus equitatu valet, peditis vires non respondent. Namurci metus ingens erat, quem sedavit nonnihil inductum militum sex mille praesidium. Sed cum Galli nondum ingressi Hispano possessa per pacatorum terras vagentur, varii varie de consiliis illorum judicant. Propius ista discam, ubi in aulam venero, quae nunc est apud Remos. Illuc eo, ut a maximo cancellario bene locatis Suediae rebus, amicorum, qui in Germania sunt, utilitatibus consulam.

Princeps Condaeus³ cum immensa quadam potestate Lotharingiam regit. Crequiacus⁴ Italiam terret, Lafortius⁵ Montipellicardi iterum circumsesso a Caesarianis, qui cum octo equitum, duobus peditum millibus pontem Brissacensem transiere, suppetias fert; & creditur exarsurum ibi bellum tracturumque majores copias sub ipso Hungariae rege⁶. Iam Ringoviam iterum nostris eripuit hostis captaque Wilsteini arce vicinis imminet oppidis viisque, Ripam, quae contra Spiram est, tenente Gallasio⁷.

Et haec quidem bellica sunt, interiora hujus regni nec ipsa in tranquillo. Frater regius⁸ vix a fuga, quam per Nannetas in Angliam parabat, abductus est captusque e domesticis ejus presbyter, Tonnelerius⁹ nomine, comparatas in cardinalis¹⁰ caput insidias detexit.

Et ut ad privata veniam, mihi funesta iterum domus morte D. Broedersoni¹¹, qui genitus sorore maximi cancellarii apud nos cum morbo manserat. De lege universis data injuste queramur singuli. Deo non minus data reposcenti quam relinquenti pro usura gratiae debentur, et publice quidem hoc etiam nomine, quod Arausionensi prudentissimo fortissimoque principi¹² valetudinem in hoc tanto rerum articulo facit secundiorem.

In Valle Telina habet Rohanius¹³ sex peditum millia, equites mille quadringentos, Cerbellanius¹⁴ pro Hispano ad Fontani Castrum sex millia peditum, equites octingentos, exspectans sexcentos alios e Neapolis regno. Tum vero illi Rhaetorum adsunt auxilia, huic Helvetiorum romanensium et Ethrusca.

Dei paternae tutelae atque praesidio et publica negotia et te, Illustrissime Domine, intimis animi sensibus commendo.

1 De Zweedse rijkskanselier Axel Oxenstierna.

2 Vgl. no. 2098 dd. 13 mei.

3 Henri de Bourbon, prins van Condé.

4 Charles Créquy de Blanchefort de Canaples; zie over hem III, p. 221 n. 1.

5 Jacques Nompar de Caumont, markies van La Force.

6 Ferdinand (1608-1657), de latere keizer Ferdinand III.

7 Matthias, graaf Gallas.

8 Gaston Jean-Baptiste de France, hertog van Orléans.

9 Zie Mercure Franç. XX, p. 887.

10 De Richelieu.

11 Erik Brorsson Rålamb, zoon van Axel Oxenstierna's nicht - niet zijn zuster - Anna; hij had ten huize van Grotius ziek gelegen en was in de ochtend van de 16e mei overleden; vgl. no. 2105, p. 484.

12 Frederik Hendrik.

13 Henri, hertog van Rohan.

14 Johann, graaf van Cerbellon.

[p. 483]

Lutetiae, XVI Maij nov. Calend. MDCXXXV.

Illustrissimae Dominationi Tuae addictissimus
H. Grotius.

Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.

In margine: A^o. 1635 R. 13/23 Junij.