Briefwisseling van Hugo Grotius. Deel 5

1827. 1633 maart 25. Aan J. de Cordes⁶.

Ex literis tuis, vir reverende, quas 25 Februarii dedisti, video meas, quas mari et Rothomago miseram ad te, amplissimum Lussonium, minorem Puteanum⁷, non minus tardas fuisse quam vestrae fuerant, de quarum tarditate cummaxime querebar. Meis non dubito, quin gelu obstiterit magnas saepe injiciens navigantibus moras. Posthac praeferam terrestre per Hollandiam, non amplius meam, iter. Illis ergo literis, quas forte jam acceperis, et gratias egeram Lindembrogii⁸ nomine pro chartis transmissis et significaveram, quod nunc repeto, gratias me summas agere regi⁹, quod in me etiam absentem beneficia sua depluere voluerit, et amicis, quod meis commodis tam perseveranter invigilent. Caeterum ego, ex quo

6 Gedrukt Epist., p. 111; Ep. ad Gallos, p. 307. Zie voor geadresseerde IV, no. 1702, p. 464 n. 4.

7 Resp. nos. 1804, 1806 en 1805.

8 Friedrich Lindenbrog; zie no. 1764, p. 44 n. 3.

9 Lodewijk XIII van Frankrijk.

[p. 110]

Gallias reliqui, nullam cur tali beneficio utar, probabilem causam video. Ideoque comiter excusari volo hoc animo, ut non minus pro hac oblata quam pro praestita hactenus liberalitate regi optimo et Galliae sim debiturus et responsurus ei munificentiae grata mente semper factis, si unquam se dederit occasio; quod opto quam maxime, atque interim Deum precor, ut regi vitam det longam et vegetam valetudinem, regno statum tranquillum, si tamen tanti boni capax est Gallia.

De rege Sueonum¹ soleo usurpare Lucani ista:

Cum tot ab hac anima populorum vita salusque
Pendeat, et tantus caput hoc sibi secerit orbis,
Saevitia est voluisse mori².

Vix dici potest, quantum ejus morte vulnus pars illa acceperit. Vix ante quoque satis sibi cohaerens, nunc multo minus sublato illo, quo velut animabatur spiritu.

Amplissimo Bignonio³ si precari velim, quantum meretur, animo id concipere non possum, nedum verbis exprimere. Dominum des Hayes⁴ vobis consolandum delego. Credite me omnia ea dicere, quae vos dicitis; quos officio in tam officiosum amicum non deesse satis certum habeo.

Valete omnes.

Hamburgi 15/25 Martii, 1633.

1 Gustaaf II Adolf, op 16 november 1632 gesneuveld bij Lützen.

2 Lucanus, Phars. V, 685-7.

3 Jérôme Bignon; zie III, p. 154 en n. 5 aldaar.

4 Antoine de Hayes; zie no. 1805, p. 83 n. 10.