Briefwisseling van Hugo Grotius. Deel 3

1315. 1628 september 23. Aan Willem de Groot¹.

Duabus tuis responsum debeo, mi frater. Cum priores circa finem Augusti scriptas reciperem et aliquo post tempore nihil hic erat, quod nuntiarem rebus ad Rupellam pendentibus; et sane etiam nunc pendent, nisi quod colloquium inter oppidanos et cardinalem² obsessorem abruptum ab illis spe auxilii nunc eo nimium cunctante repetitur sparso etiam rumore Anglorum classem partim fuga navium per vim retentarum nudatam partim perire Scotorum et Anglorum rixis aut etiam proeliis. Vita et bona salva Rupellanis promittuntur; etiam de religione aliquid. Petunt etiam privilegia vetera et quas habent munitiones. Id minus convenire judicatur praesenti rerum statui. Cujus religionis sit ille Bucquinchami³ homicida⁴ scire expetimus, ut de ejus animo et quae tanti facinoris causa minus vagetur judicium. Si quid scis, rogo impertias.

Tuas X hujus mensis scriptas jamjam accipio. Santenus⁵ quis sit, nescio nec advenit. Tilenus⁶ noster ardet discere, quid literis Casauboni⁷ evenerit et si spes edendi non est, suas repetit.

Mantuani⁸ res sane miserae sunt, nec est quod speret nisi propere Rupella sit in regis manu. Nam ante certum est de Italia nihil cogitare. Oratio Rupellensium, quam misisti, grata est, magna testis urgentis ipsos necessitatis.

Ut provinciae aliae eam tributorum ineant rationem, quae in Hollandia usurpatur, nunquam futurum arbitror. Nimium invaluit mos contrarius, et nostri pactis, illae aequitate quadam et longo usu nituntur.

Vale, mi frater, cum optimis parentibus, tua⁹, tuis et nostris. XXIII Septembris XVI^cXXVIII.

Quid de Phoenissis¹⁰ et Veritate¹¹? De Iure belli¹² hic librarium inveni. H. Spiringio¹³ rogo significes exspectare me de quibus scripsit regis huc reditum. Ante enim nihil video posse confieri.

Tuus tibi obligatissimus frater
H. Grotius.

1 Gedrukt Epist., p. 810.

2 De Richelieu.

3 Zie n^o. 1310, p. 377 n. 7.

4 Zie n^o. 1314, p. 381 n. 8.

5 Mij onbekend. aant.

6 Daniel Tilenus.

7 Zie n^o. 1291, p. 352 n. 2.

8 De hertog van Mantua, Carlo Gonzaga.

9 Alida Graswinckel.

10 Zie n^o. 1261, p. 306 nn. 3 en 4.

11 Zie n^o. 1283.

12 Zie n^o. 1289 p. 348 en n. 7 aldaar.

13 Misschien Hugo Spierinck (geb. ± 1583) uit Rotterdam.