Briefwisseling van Hugo Grotius. Deel 3

1278. 1628 juni 24. Aan Willem de Groot².

Quas tertio quasque 11 Iunii dedisti, mi frater, ita nunc pariter accipio. Scripsi ad te hodie per Opdamium³ aut Marquethium⁴. Nam utri literas amicus, qui suscepit, daturus sit, dubito.

Non multum habeo quod addam nisi quae interim didici. Mantuanum⁵ cum Sabaudo⁶ transegisse, modo rex Galliae probet pacta; Hispanum nihilominus instare Casalio munimento plusquam antehac et arctiore obsidio; Rupellae divites habere victus aliquid, inopes esurire et pellendae fami pisciculos et herbas extra moenia summo periculo quaerere, ita ut plerique intra mensem finem sibi obsidii spondeant. Angli, qui tertium venturi dicuntur, non multum regiis injiciunt metus paratis ad portus angustias tormentis centum neque largum ipsis ad vim continuandam spatium aestu indulgente, id est, non ultra horas quatuor. Regi magnus cymbarum numerus et exercitus supra viginti millia non nomine, sed reipsa, disciplinae satis laudabilis. Principis Condaei⁷ milites ferme quingenti caesi a Rohanii⁸ ducibus. Oppida duo a Mommorancio⁹ capta multa cum caede.

His, quae hodie per literas tibi commendavi, illud accedat rogo, ut memineris effigiem aut sceleton vermium ex una radice in multa capita surgentium. De Phaenissis¹⁰ intellexeris jam sententiam, rogo quamprimum sciam, quid sperari debeat. De Syriaci poëmatis interpretatione¹¹ in plerisque tibi assentio. De quibusdam obscurioribus libebit et aliorum intelligere conjecturas. Inter caetera de Solomone, quin verum dicas non dubito. Quod Hagae adversus remonstrantes factum scribis per mihi dolet. Libri de Veritate religionis Christianae¹² cardinali Barbarino¹³ aliisque Romae probantur. Hic paene omnibus romanensibus et protestantibus.

Salutant nostri te tuamque¹⁴ et tuos: simul optimos parentes et quicquid est bene nobis volentium.

24 Iunii 1628.

Tuus tuo jure
H. Grotius.

2 Gedrukt Epist., p. 808.

3 Een der van Wassenaers, heren van Obdam. Het kan Jhr. Jacob, baanderheer van Wassenaer, heer van Obdam (1610-1665), de later beroemde vlootvoogd, geweest zijn, al was hij toen nog vrij jong.

4 Zie n^o. 1249, p. 283 n. 5.

5 Carlo Gonzaga.

6 Carl'Emanuele.

7 Henri de Bourbon, prins van Condé.

8 Zie n^o. 1059, p. 27 n. 5.

9 Zie n^o. 1096, p. 69 n. 2.

10 Zie Ter Meulen-Diermanse, n^o. 496.

11 Over welk gedicht het hier gaat, heb ik niet kunnen nagaan.

12 Zie Ter Meulen-Diermanse, n^o. 944.

13 Zie n^o. 1217, p. 230 n. 2.

14 Alida Graswinckel.