Archives ou correspondance inédite de la maison d'Orange-Nassau (première série). Tome VIII 1581-1584

† Lettre MCXLVIII.
Le Duc d'Anjou au Prince d'Orange. Bonnes intentions du Roi de France envers les Pays-Bas (ARCH. ROY.).

Mon Cousin. Vous avez entendu cy-devant, et long temps y a, le désir qu'avoit le Roy, mon seigneur et frère, de me veoir et conférer avecq moy de ses affaires et des miennes; à quoy j'ay temporisé, pour plusieurs raisons qui appartiennent plus au respect d'aultruy qu'à mon bien propre; mais aians enfin considéré l'estat de la France et ce qui touche le secours et salut des Pays-Bas, quy m'ont esleu et appellé pour leur Prince et Souverain Seigneur, j'ay estimé qu'il n'y avoit rien plus nécessaire et utille à la maintention de l'ung et à la restauration de l'autre, que par une honneste submission recercher l'amitié et bienveuillance de S.M., par le moyen de la quelle je puis estre secouru et assisté en mes entreprises que j'ay recognues pour cela estre de très-difficille exécution; ce qu'aiant résolu, je me suis acheminé en petite compaignie, le 8^me de ce mois, à Paris, où j'ay veu S.M. par l'espace de 12 jours, avecq aultant de favorable et condigne réception qu'il s'en sçauroit désirer; dont, mon Cousin, n'ay volu advertir Mess^rs les Estats, ne vous, que premièrement je ne visse heureux succès de ce voiaige, pour vous en donner la joy entière et ne laisser personne en suspens de l'évenement d'icelluy, quy ne sçauroit estre meilleur ny

[p. 321]

⁺plus à mon contentement, ne m'ayant S.M. refusé d'aucune chose que je luy ay volu demander, et parce que les S^rs de la Mouillerie et d'Asseliers estoient en termes d'aller baiser les mains à sa dite Ma^té, selon la charge quy leur avoit esté donnée, je ne fais doubte que vous n'ayez veu, par la dépesche que je fis faire sur leur arrivée, après les avoir ouys, que m'ayant semblé le subject de leur voyaige par trop débille pour parvenir à une chose sy importante que celle qu'ilz attent de S.M., je fus d'advis de renvoier vers les dits S^rs des Estats pour obtenir quelque plus ample pouvoir, selon qu'il est contenu en ma dite dépesche, quy me gardera d'en faire icy aultre redicte, à quoy je vous asseure que je leur ay préparé tellement le chemin que, s'ilz ont de quoy fortifier leur requisition de quelque chose dont sa dite Ma^té puisse faire fondement, ilz obtiendront sans aucun doubte tout ce qu'ilz vouldront; mais mon Cousin, il fauldroit user de diligence et faire en ung voiaige ce qu'ilz ont accoustumé de faire en quatre ou cincq, et si tard qu'il n'y a presque plus nul remède au mal qui naist et provient de leurs longeurs; à quoy je vous prie les exhorter et semondre, leur remectant devant les yeulx le préparatif du Roy d'Espaigne pour ceste année, croyant fermement que, s'il joinet ses forces ensemble, il ne sera plus temps de chercher le remède quy leur est maintenant aysé; à quoy j'apporteray de ma part toute la facilité qu'il me sera possible, selon les offres que je leur en ay sy souvent faictes, qu'il n'est plus nul besoing de le réprésenter davantaige..... A Château Thiery, le 25^me jour de febvrier 1584.

Vostre très-affectionné cousin,

Françoys.

A mon Cousin, Monsieur le Prince d'Oranges.

+ 1584. Février.

[p. 322]

⁺Le 3 mars M.M. de la Mouillerie et d'Asseliers écrivent de Paris au Prince d'Orange: ‘Son Altèze nous a ouvertement déclaré qu'il a trouvé le Roy et tout son Conseil fort bien disposé pour faire la guerre au Roy d'Espaigne; et que ne tiendra présentement à nous qu'il ne s'embarcque, mesmes que tous ceux de sa Court, bien soixante Chevaliers de l'Ordre du Roy l'ont promis, qu'en cas qu'il faict la guerre à l'Espaignol, qu'ils l'accompaigneront en personne, tellement que son A. est retourné fort allègre et satisfaict à Chasteau Thiery. Son Alt. nous disoit aussy que le Roy estoit fort bien d'accord avec le Roy de Navarre et que tout le Royaulme estoit en paix, excepté qu'il y avoit quelque malentendu encoire en Languedoc, mais qu'il seroit bientost appaisé, et qu'il n'y avoit que craindre quelque esmotion ou guerre civille en longtemps en France. Le Mareschal de Biron nous a dict ouvertement qu'il estimoit que ne retournerions au pays sans en rapporter des bonnes nouvelles et qu'estions icy venuz fort à propos et en bon temps, pour la réconciliation qu'estoit suyvie entre le Roy et son Alt., laquelle tendoit au bien de nostre pays; mais quasy tous nous disoient trouver raisonnable qu'on accorda quelques places, tant pour l'asseurance que pour la retraicte des gens du Roy. Pourtant plaira à v. Exc. tenir la bonne main vers les S^rs Estatz, afin que sur ce soit promptement résolu, ainsy comme pour la conservation de nostre pouvre patrie sera trouvé requys. Car, si le Roy s'embarcque, comme l'apparence est, se doibt espérer fermement, aydant Dieu, d'avoir une bonne fin de si longue et pénible guerre, laquelle desja a tant d'années affligé nostre pouvre patrie, et que serons de brief remis en une paix et tranquillité désirée et durable. Nous avons dict par plusieurs fois à son Alt. que ne doubtons que la demande de l'asseurance seroit trouvée estrange par les Estatz, tant plus pour ce qu'elle n'avoit esté demandée par avant ny au traicté de Bordeaux, ny de Dermonde: mesmes que les villes qui luy pourroient estre par les Estatz accordées luy serviroient bien peu, s'il n'eust la bénévolenee du peuple. Car combien qu'on accorda l'Eseluse, Dam et aultres là entour, quy sembloient les plus apparentes, que icelles profiteroient bien peu et qu'estans les gens de guerre là dedans contre la volunté du pays, qu'on pourroit facilement les enserrer tant par mer que par terre,

+ 1584. Mars.

[p. 323]

⁺desorte qu'ilz seront constraintz de les abandonner ou mourir. Ce que son Alt. nous accorda, et contendoit¹ bien, mais disoit que c'estoit seulement pour donner quelque contentement au Roy et à son Conseil, et les asseurer tant plus de la volunté que les S^rs Estatz ont de maintenir ce qu'ilz sont contens de luy promectre de bouche et par escript.’

+ 1584. Mars.

1 Probablement faut-il lire entendoit.