Het gulden cabinet van de edel vry schilderconst

[p. 552]

Franciscus vander Steen
Plaedt-snijder van sijne Keyserlijcke Majesteyt.

NAtuer verweckt in't hert veranderlijcke dinghen
De welcke den Mensch tot veel ghelucken bringhen,

Als een gheleerde vloet van wetenschap en Konst

Dringht uyt het eel verstandt, die stets den naem bejonst

Met groote weerdigheyt, jae naer de doodt can gheven
N'en Naem die altijdt in der eeuwigheyt sal leven.

Daer vander Steen naer wacht, en hem is toe gheseyt,

Voor wie in't huys van eer van Fama wordt bereyt

Den groenen Lauwer-crans die zijnen Naem sal croonen
En langh noch naer sijn doodt aen jeghelijck bethoonen.

Dat hy om sijn verstant, vry wetenschap, en gheest

Des Keysers Domesticq veel jaeren is gheweest,

Om al de wonderheyt der vol Constighe plaeten
Die hy ghesneden heeft, en die t'gheluck der staeten

Verwinnen meer en meer, en maecken groot gheacht

De gen' van wie de Const wordt stadich voorts ghebracht.

Niet valt soo aenghenaem in edel Princen ooghen
Als daer de kennis van verstant wordt uyt ghesooghen,

Als daer men door can sien wat inden boesem steckt

Van die den aert der Const op wit papier ontdeckt.

Veel teeckeninghen en fraey Conincklijcke beelden
Van vander Steen ghedaen, de eer noch breeder melden

Jn't hooghe Duytsche-landt besonder in het Hoff

Des Keysers, daer de Konst bewijst sijn weerden loff.

Waer dat Const-Minnaers sijn wordt alle Konst verheven
T'gen' Oeffenaers der Konst in groote vreught doet leven,

Jae weckt tot neerstigheyt en jever jeder een

Waer van ghetuyghen gheeft Franciscus vander Steen.