Het gulden cabinet van de edel vry schilderconst

[p. 553]

Lucas Vorstermans den Ionghen
Plaedt-snijder van Antwerpen.

T'Pinseel bewijst den aert en cracht van alle verven

Op doeck en glad panneel, t'graef-yser en de stift

Bethoonen op de plaedt den lof die Meesters erven

Uyt wiens kloeck verstandt wordt niet als Const ghesift.

Dit blijckt in Vorstermans, alleen niet in't graveren

En t'teeckenen daer by, maer oock in d'eel Pictuer

(By hem t'hans noyt gheleert) die op den throon van eeren

Brenght Constenaers, om dat sy t'wesen en Natuer

Van alle dinghen stets soo weten af te paelen

En over tuyghen ons dat Const haer soo verheft,

(Die t'leven aerdich weet soo levendich te maelen)

Dat niet soo eel en is als Vorstermans betreft.

Daer veel ghesneden, en seer net gheetste plaeten

Sijn waere proeven van, en thoonen wat'et is

In Const volleert te sijn, die niet als lof naer-laeten

Om hunne edelheyt en schoon ghesteltenis.