Ioannes van Kessel Schilder van Antwerpen, oudt 35. jaeren.
WIst Breugel soo bisaert, en gheestich af te meten
Natuers volmaeckte deught, door onghemeyn secreten,
Daer menich cloeck vernuft op slaet sijn oogh-ghemerck
Om al de edelheyt en suyverheyt van t'werck,
Die uyt de Schilder-const door hem is voorts ghecomen
Besonder in de cleyn figuren, fruyt, en bloemen:
Van Kessel volght hem naer soo suyver, net en eel
Soo scherp, en los in't cleyn door t' toetsen van Pinseel,
[pagina 410]
[p. 410]
Dat d'ooghen verder niet haer crachten connen draghen
Als t'gen sy in dit werck aenschouwen met behaghen.
Waer van de Konst en gheest behouden d'overhandt
En wijsen uyt de kracht van Kessels groot verstandt:
Den weerschijn van sijn verf can opentlijck bethoonen
Wat wetenschappen dat in desen Meester woonen,
Soo jemandt het ghesicht maer op sijn belden slaet
Waer in den blommen aert van hem gheschildert staet,
Die t'leven en Natuer soo weten uyt te drucken
(Ten waer dat Const bedrieght) men sou hun willen plucken,
Soo gheestich, soet en mals staet elcke bloem by bloem
Coleurich uyt ghevoert en draeght van Kessels roem.
Het costelijck ghenoech dat daer in wordt ghevonden
Heeft aen my soo veel stof en reden toe ghesonden,
Dat ick my niet bequaem en ken, om d'edelheyt
Te schrijven van t'Pinseel, die Faem ghenoch verbreyt.
Kipt alle Konsten uyt die van Pictuer oyt quamen
De snelheyt in het cleyn sou t'leven schier beschamen
Die ons van Kessel weet te brenghen voor den dach
Soo eel als jemandt oyt in Konst-schildrijen sach.
Jn beesten sonderlingh als onghepluymde dieren
Ghevoghelt cleyn en groot die by de wolcken swieren
Gheschelpte zee-ghedroch dat onder t'water glijdt
En t'voeteloos ghecruyp dat t'drooghe sandt door snijdt
Wanschapen Schepsels en verscheyden vremde dinghen
Weet ons van Kessel als het leven voorts te bringhen,
Daer niet (hoe cleyn dat is) in't minsten in en blijckt
Oft door sijn Konst alleen aen't leven heel ghelijckt.
[pagina 411]
[p. 411]
IOANNES VAN KESSEL Ne dans la Ville d'Anvers en l'an 1626. paintre tres-renommé en fleurs, petites animaux etc. lesquells sont fort estimez pour leur Curieusité. E. Quellinus pinxit. Alex Voet iunior sculpsit.
Auteursrechtvrij
