Ian Baptist van Deynum Schilder in verlichtery van Antwerpen.
DIe boven eer en pracht van s'werelts dommen staet
De suyver deught bemint (die t'al te boven gaet)
Wordt vanden wijsen Man gheacht en hooch ghepresen
Midts datter noyt en was, oft is gheweest voor desen
T'gen' wordt bevonden in den mensch te sijn volmaeckt
Als dat d'oprechte deught en haere gaven raeckt.
Want jemandt die de eer wilt boven deughden voeghen
Vindt niet als naer-berouw vol onrust en misnoeghen,
Als hy eens rijpelijck aenmerckt het groot verschil
Dat ick hier tusschen deught en eer bepalen wil.
De eersucht is ghemenght met ramp en onghelucken
Die menichmael de siel ten lesten neder drucken
Door hulpe van de sond' die uyt de eersucht spruyt
Want sy noyt goedts en gheeft maer brenght vuyl weghen uyt.
En schoon dat jemandt had veel eeuwen ligghen droomen
Jn't uyterlijck ghewoel van eer en staet, sal schroomen
Als hy op d'eynde van het leven eens gheraeckt
Wanneer men niet als gal uyt s'werelts wellust smaeckt.
Die niemandt achterlaet een faem om op te roemen
Maer haestigher verdwijnt als d'alderweeckste bloemen,
Den rijckdom blijft op d'aerd' en die t'besit wort stof
Dat haest verdwenen is, daer gheene eer oft lof
Van in memori blijft, als slechts dat men hoort praten:
Hy was seer rijck en heeft veel schatten naer ghelaeten,
Waer van dat lanck ghedenckt den naesten Erfghenaem
Maer haest vergeten is by d'al ghemeyne Faem.
En t'gen' in teghendeel de Faem langh doet onthouwen
Dat is de waere deught die sy noot laet verouwen
[pagina 407]
[p. 407]
Iean Baptiste van Deynvm, Est nè d'Anuers, en l'an 1620. fait extremement bien des petites pourtraits, paisages et autres figures en miniature, et Capitain d'vne Compagnie des bourgeois dans la ville d'Anvers, en l'an 1651. I.B. van Deynum pinxit. Coenr. Woumans scul.
[pagina 408]
[p. 408]
Maer daegh'lijckx meer en meer vernieuwt in het ghemoet
Om dat haer krachten sijn lofweerdich, eel, en goet.
Soo danich vindtmen dat de Constenaers oock leven
Lanck (naer dat hun de siel heeft door de doodt begheven)
Jnde ghedachten van den mensch, die eens beooght,
Hun Const vol gheesticheyt die t'leven gans vertooght,
Soo als van Deynum oock can met t'Pinseel ontdecken
Vol nette aerdicheydt en vast ghestelde trecken
Jn suyver Water-verff oft eel Verlichtery
Daer sietmen sijn vernuft soo leven in Schildry,
Dat niet soo aenghenaem in't s'Menschen oogh can speelen
Als t'gen' sijn Const bethoont met cool, pen en pinseelen
Op effen Parcquement, papier oft wit satijn
Vol ordonnantien die als het leven sijn.
Jae sijne neersticheydt heeft hem soo veer ghetrocken
En wist den lust soo met den jever te verlocken
Dat het behaghen van sijn lieffelijcke Kunst
Vertreden heeft de pracht van t'werelts eer en gunst.
Om buyten alle sorgh de eenicheyt te kiesen,
En door de vrijheyt noot den jever te verliesen,
Dat is wanneer hy van de Borgherlijcke wacht
Was Capiteyn ghemaeckt, doch heeft des' eer veracht
Om met soo danich ampt sich staegh niet te becomm'ren
En altijdt sijn ghemoet met sorghen te belomm'ren;
Maer liever sijn vermaeck by d'eel Pictura vindt
Als met soo grooten eer en lof te sijn ghedient,
Nu spelt den gheest in rust en stille eenicheden
Nu can het vry ghepeys de sinnen gaen besteden
Om jet besonders door t'Pinseel te brenghen voort
Dat Coninghen verlockt en hunnen gheest becoort.
Soo als ons Vranckerijck en Spanien can bewijsen
Al waermen sijne Const seer hoochelijck siet prijsen,
[pagina 409]
[p. 409]
Jae in het Cabinet des Coninckx-hof ghestelt
Beneffens ander werck van menich aerdich belt,
Sulckx dat den naeme van van Deynum lanck sal leven
Door sijn Pinceelen die hem grooten luyster gheven
Iae hoe hy s'werelts eer en onrust meerder staeckt
Hoe dat de Schilder-const hem meer gheruchtbaer maeckt,
En daghelijckx vernieuwt haer kracht in sijne sinnen
Om dat hy naer de doodt een eeuwich eer sou winnen,
Een eer die noyt verslijt, oft uyt t'ghedacht en gaet
Soo lanck des' edel Const noch in haer wesen staet,
Gheen eersucht is soo sterck die Konstenaers can dwinghen
En uyt hun vry ghepeys de schilder-lusten dringhen
Soo als hier claerlijck aen van Deynum stadich blijckt
Die met de vruchten van Pictura is verrijckt
Door d'eelheyt van sijn Kunst in schoon verlichterijen
Die net en suyver sijn, daer ons sijn eel schildrijen
De proef van thoonen met een wonder gheesticheyt
Soo als de daet vereyst, wat dienter meer gheseyt.
Auteursrechtvrij
