Maistre Henry, waer by hy alles uyt den gheest was Schilderende, oeffende hem selven ondertusschen uyt den geest te Teeckenen. Eyndelijck Blommaert heeft hem inde Const soo beneersticht dat hy een overtreffende Meester gheworden is. Hy heeft tot Amsterdam onder veel andere fray dingen ghemaeckt, een seer groot plaisant stuck, waer inne comen verscheyden Naeckten van Mannen en Vrouwen, soo groot als het leven, uytnemende wel ende met verstant ghehandelt, wesende de Historie van Niobe daer haer kinderen doodt gheschoten worden van Apollo en Diana. Van de selve Historie (doch van ander ordonnantie) is van hem oock by den Keyser, een groot heerelijck ende Constvloyende stuck, daer sijn Majesteyt ende alle Const-verstandighe groot behaghen in hebben. Desghelijckx is van hem oock gheschildert een seer schoon Goden bancquet seer wel gheordonneert ende uytghewerckt, d'welck by den Graef vander Lip eertijts heeft te sien gheweest, en misschien noch onder sijn gheslacht. Voorts sijn oock te vinden by verscheyde Lief-hebbers veele andere cleen stucxkens die grooten welstant hebben. Onder andere dry tronien van Venus, Iuno en Pallas, voorts oock een doodts-hooft en ander byvoeghselen seer wel ghecoloriert ende net ghedaen, oock een Andromeda daer Perseus haer verlost. By de Const-beminders worden van hem oock ghevonden aerdige Lantschappen met eenighe boetserije, boeren, huysen, boerigh ghetuygh, boomen en gronden, die veel tot Uytrecht te sien sijn. Hy heeft gehadt een fraey handelingh met de pen, daer hy eenighe sappighe verven wist onder te menghen tot groote cracht van sijn werck. Ende ghelijck hy in alle deelen der Const seer ervaren was, gaff hy sijn dingen grooten aert ende schoonheydt, daer innne somtijts te pas brengende eenige sonneschijnen, wederlichten, duyster oft vierighe lochten naer den eys des werckx. Dese dingen (hoe wel niet overladen met werck) staen seer besonder ende uytstekende wel. Verscheyde dingen,ordonnantien en belden van hem gheteeckent met de pen, ende daer naer met wit en swert en van olie verff gheschildert sijn in Coper ghesneden door den Constrijcken Ioan Muller, ende noch meer door den vermaerden Sanredam die in sijn teeckeningen grooten lust had. Eyndelijck desen Blommaert (daer de Poeet-vloyende pen van Carel van Mander noch breeder van schrijft) was een Man van stil ende bequaem wesen die hertelijck verlieft en toe ghenegen was altijdt meer en meer naer te soecken, de gronden, crachten ende uyterste schoonheden van de volmaeckte Pictura, de welcke Blommaert om sijnen Blommen-aert (van hem bloemich verciert wesende) gheheelijck vrindelijck toegedaen ende gunstich was. Sijn Const is d'eenighe oorsaeck dat sijnen naem soo in Hollandt als Brabandt, Vlaenderen ende meer wijder plaetsen, door de alsiende spraeck ende duysent tonghsche snel vliegende Faem wordt gheruchtbaer ghemaeckt, die hem in dit boeck figuerelijck heeft doen stellen, ende door de Rijm constige Poesie vercieren.
Auteursrechtvrij
