Watapana. Jaargang 4

Nunka lo no tin bon perjodista di mas

Esaki ta e título ku Luis Daal, periodista profeshonal, a jega di duna un di su artíkulonan publiká den e revista ‘La Unión’ di Corsow.

E artíkulo èi ta mustra, ku no ta tur hende ku ta skirbi pa un korant, ta bèrdaderamente un periodista. O sea, nos periodismo no ta na e nivel ‘ku e dos islanan akí (Aruba i Corsow) ta pretendé ku nan por okupá den engranahe sosjal, ekonómiko i polítiko di Antíjanan Ulandés’. Luis Daal a trata e tópiko aki, despwés ku el a asistí na un diskurso di inòwgurashón di e kurso 1964-1965 di Skol Ofisial di periodismo na Spaha. Aja ministro di Informashón i Turismo, Manuel Fraga Iribarne, a bisa algo ku, según Daal, ta bal la pena pa nos, di Antíjanan Hulandés, pensa un rato riba dje.

Kos ta tuma e artikulo parsialmente fo'i ‘La Unión’:

Kón sitwashón di perjodismo tá na nos íslanan i, konkretamente, kón perjodismo tá na Kòrsòw ku tá e komunidat ku mas mi konosé di aseka i ku mi ta sinti mas íntimamente? Nos perjodismo tá na nivel di nos pretenshonnan i na altura di nos nesesidatnan ineludíbl, mirá na lus di aktwalidat?

I ora mi bisa ‘perjodismo’ mi no tá men únika i exklusivamente e aktividat, e konhuntu di akto i akshón materjal i intelektwal, ku nos ta jama perjodismo, sino tambe e héndenan relashoná ku e aktividat ej: perjodístanan na promé luga, pero tambe personal tékniko di imprenta i di atministrashón i dokumentashón di un korant.

Den kurso di último áñanan nos islanan a baj preparándo nan mes den hopi tereno, pa adaptá nan mes n'e sitwashón nobo ku nos tá drentando. Kòrsòw i Aruba, kaminda tin un tradishón perjodístika mas ankrá, hende por bisa, no a hasi - na mi moda di pensa - sufisjente esfwèrso pa hisa nos perjodismo buta na e mes altura ku e dos íslanan akí ta okupá o ta pretendé ku nan por okupá den engranahe sosjal, ekonómiko i politiko di Antíjanan Ulandés i di Rèjno Ulandés.

[p. 11]

Si nos puntra, por ehèmpl, kiko nos a hasi efektivamente pa formashón serjo i adekwado di perjodístanan nativo ku tá esnán ku tin (o mester tin) komprenshón di mentalidat, lenga i ambjente di e komunidatnan kaminda e korantnan ku nos ta jama antijanu ta sali i tin di sali, tá sigur ku e kontesta lo mester tá bochornosamente negativo, poko menos ku un bèrgwensa kolektivo pa nos komo pweblo ku konstántemente ta papja di libertat, di demokrasja i di òwtonomía polítiko i siguridat ekonómiko pa mañán.

Ku mira pa un mañán-Dios-kje mihó ku awe ku nos pweblo ta bibando, nos ta formando funkshonárjonan pa atministrashón públiko, militar, hurista, ekonomista, sosjólogo, maestro di skol; representántenan di tur rama di medisina, desde un spesjalista déntr di un spesjalidat, te na un enfermera ku kapasidat i experensha den tur departamentu di su profeshón, manera hospital general, sikjatría, parto, barjo, ets. Nos tin pádr i domi propjo, ser i frátr. Asta tin antijanu ku ta okupá un pwesto di konsiderashón den sirbishi diplomátiko di Ulanda, ku tá esún enkargá ku nos representashón diplomátiko.

Pa un otro banda, lo tá difísil pa hende kombensemi ku den e struktura aktwal di un komunidat demokrátiko i líbr, un perjodista no tá importante o ku perjodismo komo aktividat i suma di aktividat sosjal, intelektwal i polítiko, no tá vitalmente importante. Perjodismo, mir'é kón ku hende kje, tá un dje aktividatnan, un di e ko'ihásinan⁽¹⁾, mas importante ku tin den un komunidat modèrnu. I nos no por imaginanos un komunidat modèrnu, den mundu aktwal, sin perjodismo. Pero, ta duna kaswalidat ku perjodismo no ta existí ni por existí sin perjodista; bisá di otro manera: no tin aktividat, sin hende (ku ta produsí e aktividat ej).

Tá p'eséj, formashón di un perjodista, di hopi perjodista bon, tá un kos importante pa tur komunidat ku kje kumpli realmente ku su nòmbr di ‘komunidat di hende’ den un mundu strukturá manera nos tin é aktwalmente. No tin manera di saka kurpa pa e realidat ej.

Perjodismo tá un dje koefishéntenan prinsipal di kada komunidat demokrátiko. Mi ta men perjodismo den su nifikashón mas ampljo i generoso, den tur su kategoríanan... Segun áñanan ta baj pasando, n'tá bèrdè?, perjodismo tá manifestando su mes no solamente komo órgano viswal, imprimí i distribuwí bòw di e nòmbr kombenshonal ku nos a lanta konosé di: koránt, sino el a tira su reís tambe den otro kampo: den su forma òwditivo nos ta jam'é: radio, i kombinando kondishón òwditivo di radio ku kondishón viswal di koránt, el a para bira: televishón.

Pa nos bèrgwensa, nos tin di atmití ku na Antijanan Ulandés nos a kumpra i nos tá kumprando e aparátonan di difushón - meskós ku un riku por kumpra ko'i-hunga pa su ju maske e ju no sà kón uzanan - pero, honradamente, nos mester duna-boka ku preparashón tèkniko, moral i tambe intelektwal di gran parti di nos perjodístanan no tá na e nivel di tantu medio di difushón modèrnu asina, ni nan aktitut tampoko no tá na konsonansha ku e perjodismo ku nos pweblo tin mesté di djé den e etapa akí di su kresementu i konfirmashón di un personalidat propjo. Komprendemi bon. E komentarjo akí no tá un krítika meramente pa kritiká; é no tá un tiramentu di spèjt, sino un sorto di examen di konsenshi serjo, i hasí na públiko, di un hende ku ta kere ku no solamente é ta kapasitá pa analisá nos sitwashón i husga, sino tambe ku é tin e deber moral i profeshonal di analisá i publiká su opinjón den e asuntu akí. Perjodismo tá un kos públiko i é mester ser tratá na publiko.

(1) Uzamentu di e expreshón ‘ko'i-hasi’ (ku nifikashón di aktividat), no tá un kapricho di mi parti o un antoho di kje uza un palabra na papjamentu. Talbés na un otro okashón lo mi por intentá splika e pakiko riguroso di su uzu, pero lo tá bon nos tene kwenta ku ta hende so (esta ser umano) tin ‘ko'i-hasi’ (kos di hasi). I tá su ko'i-hasi, presisamente, ta distingui hende di bestja i di sernan no-animá.
Madrit, òktóbr di 1964.
Luis H. Daal

[p. 12]

P'eséj, ata un par di pregunta ku m'a hasi mi mes. Tá pregúntanan ku mi ta kere ku ta meresé atenshón serjo di esnán jamá pa vela (goberná ta nifiká mirá p'adilanti pa barku no kana subi tera o pega) pa nos interesnan di mañán; no miskiñamente, esnán di un grupo chikí so, sino esnán di hinter komunidat:

a)	Kí posibilidat tin pa organisá un kurso di perjodismo obligatorjo pa tur e hendenan ku kje ehersé perjodismo profeshonalmente i ku no tábata nunka den perjodismo aínda?
b)	Lo tá posibl organisá un kurso di emergensha pa kapasitá esnán ku aktwalmente tá ehersjendo perjodismo profeshonalmente na Antíjanan Ulandés?
c)	Lo no tá kumbinjente stimulá den e muchanan ku ta kita skol, interés pa perjodismo promé i, despwés, amor p'e profeshón ej, ofresjéndonan, fo'i e hopi békanan ku tur aña ta duna pa antijánunan baj studia afó, chéns di por studia perjodismo, sea
1)	na un skol ofishal di perjodismo o na un univèrsidat merikanu, suramerikanu o oropeo;
2)	o trahando práktikamente na un koránt, sea na Merka, Suramérika o Ulanda, si nan preparashón base no ta pèrmitínan studia na un di e institushonnan ej, pero nan kapasidat práktiko si a keda demostrá?
d)	Lo no tá kos di pensa ariba, pa trata di realisá loke e púntonan anterjor kje sugerí respekto di korant, esta prensa skirbí, tambe pa radio i pa televishón?

Konsiderando e púntonan ku m'a kaba di menta, hende no por laga di jega n'e konklushón ku nos tin un lagun ku no por keda asina muchu tempu mas; nos mester jena e ‘bashí’ ku falta-di-ordenashón, ku faltadi-reglamentashón di nos perjodismo ta butanos sinti, kada día mas.

Riba e punto akí lo tá nesesarjo legislá pronto. Si Gobjèrnu no presentá un projekto di lèj den e asuntu akí, tá deber anto di Staten (o di Konseho insular di kada isla pa loke ta toka teritórjonan insular) pa tuma inisjativa, ku tá un di nan deréchinan fundamental.

Tá solamente ora ku nos perjodismo ta sintá sigur riba stul di un legislashón adekwado, ku ta spesifiká kiko tá kada ken su derechi i su deber, nos lo por spera ku exeso i abuzu den e kampo akí por ser evitá. Den un komunidat demokrátiko i líbr, tá un prensa líbr, pero reglamentá, legislá, lo por sirbi nos pweblo manera mester tá.

Tin varjos manera di reakshoná na un artíkulo manera esaki. Hende lo por lesa e trabòw akí i baha kabés, bisa ku, efektivamente, ‘loke e artíkulo ta plantea n' ta laga di tá bèrdat i ku loke é ta proponé tá mashá bon, mashá positivo, pero ja...’

Pero, tambe lo tá posibl pa hende reakshoná di un manera mas positivo riba un komentarjo asina konkreto i di un perjodista ju-di-tera ku ta defendiendo no su pan, ni su interés partikular di chikí, ma ku ta boga pa bjenestar general di nos komunidat kaminda ni biba é n' ta biba sikjera i di kwa é no tá derivando ni 'un sorto di probechi.

Owtoridatnan di siñansa i kultura, tantu sentral komo di teritórjonan insular, talbés, lo por analisá e komentarjo akí ku e serjedat, ku e ekwanimidat i, espesjalmente, ku e imparsjalidat i serenidat moral ku mi ta kere é ta meresé.

Luis H. Daal