De Tsjerne. Jaargang 20

[p. 441]

Tiny Mulder:
Under peil

jawis minhear de jong
it is to gek
forjeffenis minhear
foar hwat ik skreau en dichte
mar yn my wie
in hiel gek bern de baes

in hiel gek bern
dat rare snuten lûkt
in lange noas útstekt
it wol samar hwat boartsje
mar né
de earnst der tiden
en in kwartsje is in kwartsje
by jo moat alles echt

by jo moat alles echt
en slim en deadsgefaerlik
nim my net kwea
soms laitsje 'k ûnbidaerlik
of ik?
dat gekke bern dan hè
dat noait to smoaren is

dat noait to smoaren is
as it him slagje mocht
jou festjeknopen
en dy fan jou besgroentsje
los to pjukken
hwat foun er dan
in âlde hear mei nukken
of ek sa'n fuoi-ûnsjoch
folslein mesjogge bern

folslein mesjogge bern
dat mar ien eangst bifangt
soe ek de hear fan himel en fan ierde
krekt lyk as jo
ús drege earnst gebiede
soms reitsje 'k yn panyk
mar sjoch syn skepping oan

[p. 442]

 

mar sjoch syn skepping oan

 

de fûgel mei it reade poeha-boarst

 

de kikkert

 

is dy even goed gek skepen

 

en de komike mandril en

 

dat bist mei fuotpaedstrepen

 

sels cork hie it sa komysk noait bitocht

 

 

 

jawis minhear de jong

 

't is fiersto gek

 

forjeffenis minhear

 

foar hwat ik skriuw en dichtsje

 

mar yn my is

 

in hiel gek bern de baes