De Tsjerne. Jaargang 20

[p. 405]

[Nummer 11]

Durk van der Ploeg:

It romtlik sykheljen

De goaden wenje
Yn de minsken
De minsken wenje
Under de wolken
Yn de djipten
Fan de stêdden
Yn it lânskip
Fan masines.

Wy groeije nei
It romtlik sykheljen
En wurde lykas de ingelen
Mei wjukken oan de skouders
Fuortflein fan de
Print fan it Jounsgebet.

De ierde in ôfgroun
Fan minsken
Stimmen fordrinke
Yn de wrâld
De dea is in
Folsleine romte.

Dit binne de
Woartels fan it fortriet
Romte twivel dea
De werklikheit fan
It tinken
En nimmenslân
Yn de ûre fan de dea.

It is eangstich
Net to leauwen

Dy't in stim hat
Ropt

[p. 406]

Appeltsjes fan oranje

Leafste,
De Steat hat in stek
Om it park sette litten
Mei lytse oranje appeltsjes
Yn it lofwurk.
Allinne de greate
Wize en forstannige
Beammen kinne
Jouns de moanne
Noch oer it park tille,
Mar nea
Sille wy wer togearre
Under de fike
Ynitialen stean
As ik dy neam
Leafste,
Hwant de Steat
Hat in stek
Om it park sette litten
Mei lytse oranje appeltsjes
Yn it lofwurk.