De Tsjerne. Jaargang 20

[p. 365]

[Nummer 10]

Durk van der Ploeg:

†

It lichem as in liniael,
De hannen dy't fansiden griepen.
Sa lei er mei de eagen iepen
To wachtsjen foar it Arsenael.

Hy wie syn libben lang chauffeur.
Mar op in nacht siet er to sliepen,
It útsicht waerd sa ljocht en iepen;
De holle knikte force majeure.

Dit is it teken fan de dea,
Dit is it teken fan it libben.
En foar de djipbidrôve sibben
Dekt de forsekering de skea.

[p. 366]

De iene is de oare net

De iene is de oare net,
Al skodzje ús levers fan moralen
En binne wy dan foar de wet
Ek boargers sûnder idealen.

De iene is de oare net.
Binn' jo in man fan talen?
Ik bin jou buorman efter 't sket
En lês jou reisforhalen.

De iene is de oare net,
Jo ha jou eigen plichten.
Ik bin jou buorman efter 't sket
En skriuw swiersettige gedichten.

De iene is de oare net.
Ha jo in wiif mei sinten?
Ik bin jou buorman efter 't sket
En libje fan de rinten.

[p. 367]

Myn soan fan 6

Myn soap fan 6 tekent in tún
Mei stuollen, touters
En puntmûtskabouters;
De beammen hingje oan 'e krún.

It hûs fan fjûr en grien,
It grize dak
In linnenrak
En blau it tún,
De beammen brún.
In mantsjemosk left sûnder skonken
To sinnebaeijen, fel oer bonken.

Mar hwerom is de himel swart?
It is gjin nacht of oare deis
Myn soon fan 6.
Hwerom net griis,
Hwerom net read?
De himel is sa swier as lead.

Hwerom is de himel swier,
Hwerom lakest, bistou blier?
Bistou net bang?
It lok is mar in finger lang.
Skras yn it swart
Mei 't hurdste giel
Twa bulten fan in fetkamiel,
In inketfisk mei fjur'ge poaten,
Reade seilen op wite boaten.
Meitsje de himel ljocht fan snie.
Of tochtst' dat de ierde himel wie
En himel ierde, soan fan 6?

Wy binn' al ieuwen ûnderweis.

[p. 368]

Der sit in neger yn 't gesticht

Dit is in inketswart gedicht.
Der sit in neger yn 't gesticht;
Hy is net kwea, hy is net gek,
Mar 100 kilo oan gewicht.

In blanke batman mei in sek,
Smyt him it iten foar de bek
En slacht him lyk yn it gesicht.
Hy ropt forwoeden: Frette Black!

Mar Harlem dat is Harlem net.
Dy blanke batman mei syn pet
Dy giet nei de fordommenis,

As earst ús tiid mar kommen is
Dat wy yn Central Park op banken
Sitte; in dieretún foar blanken.