De Tsjerne. Jaargang 20

[p. 346]

Jan Dotinga:
Twa oersettingen

In momint mar (Paul Vesey)

AS IK NEI DE SINNE SJOCH
Ik roun nei de ûndergrounse
om oan it loket in kwartsje to wikseljen.
EN BITINK DAT DIZZE GREATE IERDE
Twa opslûpen fammen stiene dêr
mei de bigearte nei nijs yn 'e eagen
MAR IN BIWYSKE IS FAN HWAT
hwant alles yn har nijwoune wrâld
woene se witte.
IN MILJARD JIER TOBEK YN HJITTE EN FJUR
UTWURPEN IS
Se ûntdieken my en fregen fleurich:
‘Binn' jo in Arabier?’
DAT DIZZE WRALD DOE NOCH SUNDER LIBBEN WIE
Ik glimke foarsichtich
dat wurdst op 'en dûr
en skodholle.
LYKAS SE OER IN MILJARD JIER
‘Egyptner?’
WER WEZE SIL
Ik glimke en skodholle
en gyng fierder.
HWAT BITSJUT DAN IT STUIT DAT IK FORRET WURD
Ik bin noch gjin sawn stappen fierder
FORHUDDUKE DELSLEIN
dan jowe se my rêd nei
OF TROCH LEAFDE OF TRIOMF FORWAERME?
‘Of nikker?’
In momint mar
HWAT BITSJUT IT DAN DAT IT MY GEK MAKKET?
it nimt noch altyd in momint
HWAT HAW IK FOAR SIN
dan
TUSKEN DIT DAKLEAZE SOADTSJE
kear ik my om
KREPEARJEND YN 'E ROMTE
glimkje,
SPYLBAL FAN 'E TIID?
en skodhol je ja.

[p. 347]

De trom fierwei (Calvin C. Hernton)

Ik bin gjin byldspraek of symboal.
Hwatstou hearst is net de wyn yn 'e beammen,
net in kat dy't op strjitte kneppele wurdt.
Ik bin 't dy't op strjitte kneppele wurd.
Ik bin 't dy't skriem, laitsje of wille haw.
Ik siz dit omt ik bistean.
Dit is myn lûd.
Dizze wurden binn' mines, myn
mûle seit se, myn hân skriuwt -
Ik bin in dichter.
Dou hearst hoe't myn fûsten
tsjin dyn earen slaen.