De Tsjerne. Jaargang 20

[p. 180]

Tiny Mulder:
Juffer Goedekoop

soms wurd ik wekker nachts
't is juffer goedekoop
mei har griis fûgelkopke
op in swartblomme hobbesek
neist myn bêd
se seit
it is net bard
gjin gas gjin fjûr
se streaket mei har koarte tomme
myn fankeshân
dát wie in dream dit is de werklikheit
dream net ôfgryslik leafke
roethje is goed troud
hast har wol kend
ik bin ek bêst tolânne kommen
stoarn yn myn bêd
dat oare is noait bard
dream net ôfgryslik leafke

soms wurdt ik wekker nachts
't is juffer goedekoop
mei har reumatyske hannen
skuort se de brievekaert fyn
mei har hânskrift myn adres
poststimpel westerbork
- stjûr my in skelk ast kinst

ik moat hjir jirpelskile

't is hjir wol ridlik

roethje is hjir ek -

dy is noait skreaun
se yt de snipels op

se lei yn 't sikehûs
forbean foar joaden
ik haw wier alles ôfflein
siz ik nachts
himel en ierde
juffer goedekoop
doomny's dokters direktrices
net ien wist rie wist plak

[p. 181]

 

foar myn âlde deasike joadinne

 

wier juffer goedekoop

 

jouns lei der yn jou bêd in blonde frou

 

doe de brievekaert

 

en fierder tael noch teken

 

safaek as jo dy kaert forskuorre

 

bringt de post him wer

 

 

 

soms wurd ik wekker nachts

 

dach juffer goedekoop

 

se streaket mei har koarte tomme

 

myn frouwehân

 

en altyd seit se wer

 

it is net bard

 

dream net ôfgryslik leafke

 

juffer goedekoop al wurdt se 140

 

sil net stjerre ear't ik stjer

 

se is myn libbenslang

 

forskriklik

 

forskriklik guodlik