De Tsjerne. Jaargang 18

[p. 6]

Jan Dotinga:
Lytse erotyske suite

I ik haw foar ús twaën

plak bisprutsen

yn de romten fan it lok

en elke dei dêr hinne

sil in paed mei blommen wêze.

en dou

dou silst wenje tusken

de waermte fan myn wurden,

deun oan de hertslach

fan in duorjende bloei.

II dy

myn fruchtbigjinsel

draech ik op de tsjelken

fan in lichte leafde.

de stâlle fan it freegjen

lâns wynderje ik sêft sniene blêdden,

yn it forhoalen fan in trilhier

waechs ik wachtsjend mei.

yn de fioelen nacht

libbet it ljocht op de

hûd fan in blom.

III embryonale sliep

yn de klûs

fan elkoars tokoart -

wachtsjend op de oanfal

fan it ljocht.