De Tsjerne. Jaargang 10

Krityk yn it koart:
Rimen, bylden en teltsjes.

STOBE AN KIMING, dachte, bile an tääle üt Frashlönj. Frashe Ferlag 1955.

De nije Noardfryske blomlêzing ‘Stobe an kiming’, neffens it foarwurd gearstald fan M. Siewertsen en A. Boysen, is útjown mei stipe fan it Dansk-Frisisk Selskab, hwaens warbere foarsitter lektor Jörgen Hatting ta dit doel gâns jild byinoarfandele hat. Dat jowt meiiens it swakke sté yn de hiele opset oan: de blomlêzing sil suver allinnich brûkt wurde fan Deensk-oriëntearre Noardfriezen, ek al om't hja it, doe't dit boek forskynde, mei har Dútsksinnige lânslju noch net iens wurde kind hiene oer de stavering. Soks komt forkeap en forsprieding nou ienris net to goede en it gebrûk op 'e skoallen allikemin. Dochs is dat spitich, hwant hjir wurdt eat jown dat tige doel hat nou't safolle Noardfrysk wurk forâldere en útforkoft is, en dat boppedat oan alle kanten bisjen lije kin.

De gearstalders hiene harsels oars net sa'n ienfâldige taek steld: hja woene in blomlêzing jaen, gaedlik foar skoalle en hûs, foar âld en jong. Dat is knap slagge en sels sa slagge, dat de litteraire kant fan 'e saek ek noch syn gerak kriget. Dêr drage dan binammen de fersen fan heit en soan Johannsen, Kath. Ingwersen, Alfred Boysen en oaren ta by, dy't altyd sympathyk, almeast goed en

[p. 351]

bytiden tige knap binne. It proaza is oer it algemien litterair swakker, komt net boppe ús foarige-ieusk teltsjepeil út, al binne de libbensbiskriuwings fan inkelde greate Noardfriezen wol fan bilang, al is it nijsgjirrich, ris eat út Storms ‘Skimmelrider’ yn it Noardfrysk lêze to kinnen, en al waerd it wol tiid, dat de bern yn Noardfryslân inkelde algemien bikende mearkes nou ek yn 'e eigen tael lêze kinne. Mar mei dat lêste wurdt de bondel doch eins wer it skoalboek, dat er èk wêze moat, om't krapte oan jild en publikaesje-mooglikheden dy kombinaesje nou ienkear easket.

De reproduksjes fan wurk fan Noardfryske skilders binne op harsels tige moai en slute goed by de skreaune ynhâld oan.

Ien mei oar is dit wol in boek wurden, dat ek fan bilang is foar dyjingen yn ús Fryslân, dy't neijer mei lân, folk en kunst fan dat oare Fryslân yn 'e kunde komme wolle. Dêrom is it in goed ding, dat it boek by it Buro foar Kulturele Saken yn Fryslân foar bilangstellenden to keap is; de priis is f 4,50, net tofolle foar sa'n kreaze útjefte.

M.S.