De Tsjerne. Jaargang 10

Frysk en Frjemd:

Fan herten lok!

Wy moatte diskear, en dan grif oan it bigjin, efkes stappe bûten it ramt fan dizze rubryk om ek fan dit plak ôf út namme fan de Tsjerneredaksje in hertlike lokwinsk to rjochtsjen oan de Fryske skriuwer Ulbe van Houten, winner fan de Gysbert Japicxpriis 1955. De advyskommisje fan deskundigen, op oanwizing fan de Fryske Akademy bineamd troch Deputearre Steaten, bistie dit jier út mefr, dr D. Simonides en de hearen B. Tuinstra en dr A.S. Wadman. De bikroaning omfettet beide hichtepunten fan Van Houtens oeuvre: De sûnde fan Haitze Holwerda (sechde printinge yn 1954) en De hillige histoarje.

Wy forbine oan dizze lokwinsk graech twa oare winsken: yn it foarste plak dat Van Houten tiid en ynspiraesje fine mei ta it skriuwen fan in nije roman; en twad, dat syn forsille forhalen en ‘sketsen’ mei gauwens bundele en útjown wurde sille.

In tsjil kin nuver rôlje.

De útjowers fan it bikroande Amerikaenske berneboek ‘The wheel on the school’ fan de skriuwer Meindert de Jong hawwe de fortaelrjochten foar it Frysk en it Nederlânsk net ôfstien oan de Fryske útjowerij (Laverman) dy't dêr, lykas wy foarige kears skreauwen writen ta die, mar oan de útjowerij ‘West-Friesland’ yn Hoarn. Dy sil nou, is de hjitting, takomme jier beide oersettingen op 'e boekemerk bringe. Mefr. Auck Smit-De Boer sil foar de fortaling riede.

Skriuwers opponearje har.

Us redaksjelid Fedde Schurer is - net yn dy funksje uteraerd - útnoege om diel to nimmen oan de konferinsje oer litteraire krityk

[p. 352]

dy't op 28 en 29 Oktober o.s. yn Den Haech op útnoeging fan de Jan Campertstichting bilein wurdt. Der sille ynliedingen hâlden wurde troch C. Rijnsdorp, Pierre H. Dubois, Jos Panhuysen en mefr. dr Annie Romein-Verschoor. Mei Schurer sille as ‘opponinten’ fungearje de Flaming C. Bittremieux, Th. Govaert en Jan Walravens. Schurer sil de opponint wêze fan de bikende essayist Rijnsdorp (lieder fan de Prot.-Kristlike auteurs fan it moanneblêd Ontmoeting) dy't sprekke sil oer: ‘De critiek en het publiek’.

Even op 't waerglês sjen.

It Boun fan Fryske Kunstners is nou wer safier hinne dat syn meidielingsblêd ‘It Waerglês’ wer forskynt, nou ûnder redaksje fan P. Terpstra (skriuwer ek fan it bistjûr). Foarsafier't it de net(-organisearre) kunstners ûnder ús lêzers ynteressearje mocht, diel ik mei hwat dat Waerglês û.o. fornijt oer it ledetal fan it Boun: de seksje (hjir ‘kunstfak’ neamd) byldzjende kunst hat 56 leden, de seksje boumasters acht, de seksje litteratuer (fan Paulus Akkerman oant en mei Jan Wybenga) op 'e kop ôf 40.

Fan Boalsert oant Iran.

De romanpriisfraech fan de Kristlik Fryske Folksbibleteek binne njoggen hânskriften foar ynkommen; as karmasters sille fungearje mefrou dr D. Simonides, S.E. Wendelaer Bonga en Sj. Rusticus. - In ienfâldich, tige ienfâldich optelsomke hat my dúdlik makke, dat yn de wiken en dagen fuort fóar de o.s. Fryske Boekewike (iepening diskear 7 Novimber) dochs noch in tsiental nije Fryske útjeften forskine sil. En oer fariaesje hoecht men net to kleijen, frijwol alle genres binne yn dit lytse tal fortsjintwurdige: fan ‘Tutte mei de linten’ oant en mei in nije (posthume) bundel meditaesjes fan dr G.A. Wumkes silger (de lêste to forskinen by Osinga, Boalsert). - De Arbeiderspers N.V. yn Amsterdam hat, sa is my trochdien, sa goed as ôfsjoen fan de plannen, ek de Fryske versy fan Abe Brouwer syn ‘Zandduivel’ op 'e boekemerk to bringen. - Piter Terpstra is dwaende mei in nij toanielstik yn trije bidriuwen (thema: it twade houlik) dat nei Nijjier yn Drachten ûnder regy fan Lammert Popma syn première bilibje sil. Spilers binne leden fan it Drachtster kritetoaniel. - It regear fan Iran hat de Amerikaenske filmmaetskippij Paramount forsocht, yn dit kin in film op to vimmen oer Omar Khayyam, de greate Perzyske dichter en wiskundige, forstoarn yn 1123, yn Fryslân bikend wurden troch de (nou bundele) oersettingen fan Inne de Jong.

FREARK DAM.