Trotwaer. Jaargang 26

[p. 250]

Troch it each fan in oar
Hylke Tromp
Lot

Ienris begûn is der gjin op'en nij:
de kym ûntjout him yn de rigels fan
dit fers dat al bestiet, sels no't it noch
gjin wurden hat, mar stadich bleatkomt
út de tsjustere rillen fan de tiid;
- in bern mei noed bewuolle yn de wite

wynsels him al foarbeskikt doe't nimmen

weet hie noch fan wa't er wêze soe,

groeit ûnûntkomber nei it stiennen krús

dat him al wachtet, wylst er inkeld libbet

út syn bline langstme nei de waarme fluezen

fan de frou dy't him foargoed ferstjitten hat

en libbenslang foar straf in ûnberikber

liifmoer bliuwe sil, in ûntagongklik skûlliif

foar har sâltbetrienne frucht, dy't earst

ûnwittend, letter langjend, stribjend sels,

mar lykwols op it lêst deawurch en alle rie

t'en ein yn it Sodom en Gomorra fan syn dagen

klomjend op reis is nei it andert op de fraach

dy't nimmen steld hat: de leagen fan de tiid,

dy't driuwt nei hieltyd slimmer pleagen

dy't earne al bestean, - as niis de wurden

fan dit fers, dat noch net skreaun wie

en no al.

Ynspirearre troch de stúdzje ‘Alles yn leafde’ fan Gerrit Breteler.

[p. 251]

Gerrit Breteler, Alles yn leafde
Stúdzje yn akryl, ynspirearre troch Hylke Tromp.