Dit is een suuerlijc boecxken

28. aant.

Dit liedeken gaet op die wijse O fiere nachtegael

28.1.
OCh ligdi nv en slaept
o leuende gods sone
och ligdi nv en slaept.
hier bouen inden throne
stant op ende weest ghereet
en wilt doch tot mi comen
thoont ons v godlicheit
v godheit is so schone.

28.2.
¶ Vie clopt daer aenden muer

[p. 91]

 

om mine ghenadichede

 

die doot wert mi so suer

 

eer ic mocht maken vrede

 

den toren was so groot

 

hi dede den hemel sluyten

 

leert liden totter doot

 

oft ghi moet bliuen buyten

 

 

 

28.3.

 

¶ O ihesus lieue heer

 

hoe sal ic bi v gheraken

 

dat leuen lust mi so seer.

 

ic en can gheen liden smaken.

 

het dunct mi swaer arbeyt

 

om troost so ben ic comen

 

thoont ons v godlicheyt

 

v godheyt is so schone

 

 

 

28.4.

 

¶ Ghi waent dat ic ben scapen

 

ende dat ic v niet en kinne.

 

ghi mocht v seluen laten

 

ende lijden doer die minne

 

ic moest so vele lijden

 

soude hemelrijc ontsluyten

[p. 92]

 

in lijden moet ghi verblijden.

 

oft ghi moet bliuen buten

 

 

 

28.5.

 

¶ Ihesus gheminde heere.

 

hoe mocht v steruens lusten

 

dat cruys woech v so seer

 

ende ghi en mocht niet rusten

 

om onse salicheyt

 

droechdi een doornen crone

 

thoont ons v godlicheyt

 

v godheyt is so schoone

 

 

 

28.6.

 

¶ Al stondi daer tot morghen.

 

so en mocht ghi niet versinnen

 

oft in v hert verborghen

 

hoe dat mi dwanck die minne

 

dat ghi sout sijn ontlast

 

ende hemelrijc ontsluyten

 

dus moet ghi liden last

 

of ghi moet bliuen buyten

 

 

 

28.7.

 

¶ Ic sie den lichten dach

 

al doer die wolcken dringhn [dringhen]

 

ic sie dat niemant en mach

[p. 93]

 

den wille gods volbrenghen

 

hi en hebbe verduldicheyt.

 

in liden waer dat ic come

 

thoont ons v godlicheyt

 

v godheyt is so schoone

 

 

 

28.8.

 

¶ Ghi waent met alder lust.

 

des vleysch tot mi te raken

 

het heeft mi meer ghecost

 

hemelrijc te smaken

 

druc lijden ende seere.

 

doet hemelrijc ontsluyten

 

ghi moet noch lijden meer.

 

oft ghi moet bliuen buyten

 

 

 

28.9.

 

¶ O die liefste die ic weet

 

ghi woont in hemelrijke

 

ic ben nv al bereet.

 

om te lijden blidelike

 

pine druc ende leyt

 

op dat ic v hebbe te loone

 

thoont ons v godlicheyt

 

v godheyt is so schone