Dit is een suuerlijc boecxken
(1957)–Anoniem Suuerlijc boecxken, Dit is een–
Auteursrechtelijk beschermd¶ Dit liedeken gaet op die wijse. Het was een lodderlick pape.19.1.
HEt wiel een hemels dauwe
in een cleyn maechdekijn.
ten was noeyt beter vrouwe.
dat dede haer kindekijn
dat van haer wert gheboren
ende si bleef maghet fijn
o maghet wtuercoren
lof moet v altijt sijn
19.2.
¶ Die maghet ghinc met kinde.
gheen swaerheit en ginc haer an
als ioseph dat versinde
die goede rechtuaerdighe man.
hi dacht ic wilse laten
ic en ben die vader niet
on trecken mijnder straten
eer mi meer schandn [schanden] gheschiet
19.3.
¶ Al van des hemels throne
sprac hem die enghel an
| |
[pagina 66]
| |
o ioseph dauids sone
o goede rechtuaerdighe man
blijft alle beyde te gader
het is bouen natueren cracht
dat god almechtich vader
in haer dus heeft gewracht
19.4.
¶ Corts daer na een comen
een keyserlic ghebot
dat niemant wtghenomen
hi en quame al sonder spot
van daer hi waer gheboren.
ende brenghen sijn tribuyt
dat dede men daer horen
ende roepen ouerluyt
19.5.
¶ Maria ende ioseph mede.
quamen te bethleem waert
want dat was iosephs stede.
als ons die scriftuere verclaert.
si en mochten niewers inne
men wijsdese altoos voert
die hemelsche coninghinne
| |
[pagina 67]
| |
en was daer noeyt ghehoort.
19.6.
¶ Int velt so hebben si vonden
een huys seer dinne ghedaect
binnen so corten stonden
hebben si daer logijs ghemaect.
daer wert die maghet moeder.
al sonder wee oft pijn
van smenschen sone een broeder
hoe mocht hi ons nader sijn
19.7.
¶ Wt moederliker minnen
leyde si hem op haren schoot
haer herte verblide van binnen
dat dede sijn mondekijn root
si custen aen sijn wanghen.
si suchte menichfout
dat hi quam sijn gheuanghen
verlossen ionck ende out
19.8.
¶ Maria suuer fonteyne
daer god sijn rust aen nam
bidt voer ons al ghemeyne
versoent dat godlijc lam
| |
[pagina 68]
| |
so dat wi moghen gheraken
hier bouen int soete dal
daer vruecht is bouen maten
die eewelic dueren sal
|
|