Schriftuerlicke liedekens met noch sommighe lofsangen ende ghebeden

[Aenhoort broeders en susters te gaer]

Na de wijse: In doots ghewelt lach ick ghevaen.

AEnhoort broeders en susters te gaer
Die hier onder de Papisten noch wesen
En geerne soudt hebben een Ghemeynte claer
Met alle ^aordeninghen tot desen
Die nae Paulus woort
In een Kercke behoort

a Hebr.6.1.

[fol. 6r]

 

Als ^bBisschoppen, Senjoren, Diaken

 

So daer gheschreven staet

 

Met woorden delicaet

 

T'welcke niemant en can versaken.

 

Ende boven dien daer naer

 

Doop ende ^cNachtmael eendrachtich

 

Discipline ende oock de prophetie

 

Van God hier bevolen warachtich

 

Door zijnen wijsen raetslach

 

Ons ghebrocht al aen den dach

 

Tot ^dopbouwinghe sonder verstooren

 

Dies ick u prijsen moet

 

Want t'is Gods wille goet

 

Also ghy inde ^eSchrift meucht hooren.

 

Maer siet wel toe, broeders eerweert

 

Dat ghy tot geenigher ure

 

Min of meer ^fCeremonien begheert

 

Inde Kercke, dan ons de Schriftuere

 

Ghebiet te houden certeyn

 

Dus hout u daer by reyn

 

Want dickwils sietmen dolen

 

Die hier worden so stout

 

Ende den ^gReghel niet en hout

 

Die God selve heeft bevolen.

 

Want hoe zijn alle abuysen groot

 

Inde Roomsche Kercke ^hghecomen

 

Eerst warent middel dinghen minioot

 

Maer nu dorven sy wel verdomen

 

Die daer teghen ⁱkickt

 

Of een half woort sprickt

 

Alsomen siet tot drucx verconden

 

Al betoochtmen int crijt

 

Dat teghen Gods woort strijt

 

Oude gewoonten wilmen recht ^khouden.

 

Dus na dien ghy sulcke schade siert

 

Door ^lonwetentheyt wat ghebieden

 

So bid ick u dat ghy sulcke middelen vliet

 

Waer deure sulcx mochte gheschieden

 

Hier nu tot eenighen keer

 

Ende siet ^mop Christus leer

b Tim.1.5.
1.Tim.3.1.
Acto.6.3.
Titi.1.6.

c Mar.16.22
Matt.26.20.
1.Cor.11.14.24.
Luce 22.14.

d 1.Cor.11.

e 1.Cor.11.17

f Acto.15.20.
1.Thes.4.3.
Matth.17.3.
Deut.6.2.

g Acto.15.20

h 1.The.4.3.

i Acto.5.28.

k Mat.15.2.
Matt.7.13.

l Esa.29.21.
1.Tim.4.3.

m 1.cor.11.2.

[fol. 6v]

 

Of dat was inde Apostelen tijden

 

En so ghy dat niet ⁿen leest

 

Al hevet langhe gheweest

 

So moet ghy sulckes mijden.

 

En volcht den Paus niet op dit pas

 

Int kiesen der Dienaren der Kercken

 

Want ^ohy setse in met ghewelt seer ras.

 

Door gheschencken also ick mercke

 

Teghen der Ghemeynten danck

 

Dat is haren ganck

 

Al zijnse ^pgierich in al haer hantieren

 

Ende dronckaerts tot dien

 

Men hoort niet ghebien

 

Boete van sulcke manieren.

 

Ia hoe snoo sy zijn van leven boos

 

Door ^qgiften connen sy verwerven

 

De beste benifitien altoos

 

Al tot haer eewich verderven

 

Maer ^rwilt haer zeden siet

 

Daer in volghen niet

 

Want Paulus seyt warachtich

 

En wilt niet licht int lant

 

Hier ^sop legghen de hant

 

Maect u vreemde sonden niet deelachtich.

 

Dus hoort wie datmen kiesen sal

 

Na der Schriftueren ghewaghen

 

Die puer ^tzijn van rechten geloove al

 

Niet kijfachtich ten geenen daghen

 

Gheen nieuwelinck aenhoort

 

Noch oock die licht hem stoort

 

Of droncken drinct certeynich

 

Maer vriendelick altijt

 

Niet kijvet, noch en bijt

 

Ende oock gastvry ghemeynich.

 

Die oock de gaven hebben ontfaen

 

Om die wedersprekers tot desen

 

Metter Schrift te connen ^vwederstaen

 

Ende oock van gheruchte en wesen

 

Die oock, verstaet den sin

 

Niet staen na boos ^xghewin

n 1.Tes.1.6
Phil.3.17.

o Titi.1.5.
1.Tim.3.1.
2.Tim.2.1.

p Lev.21.17.
Ezec.44.7.

q Lev.21.7.

r Titi.1.5.

s 1.Tim.3.2.
2.Tim.2.1.
1.Tim.5.22.

t Titi.1.6.
1.Tim.2.3.
1.Tim.3.6.
Titi 1.7.
1.Tim.3.6.

v Titi.1.11.
1.Tim.3.6.

x 1.Tim.3.3
Levit.21.17.

[fol. 7r]

 

Hebbende oock een deuchtsaem vrouwe

 

En kinder over al

 

Sulcken men kiesen sal

 

Al achtent veel niet nouwe.

 

Hoort noch hoe ditte toe gaen moet

 

Als ghy ^yDienaren hebt van doene

 

Niet als de Paus van Roome en doet

 

Door giften ^zof vrienden coene

 

Of door een Bisschop alleen

 

Verstaet doch wat ick meen

 

Want een Dienaer moet zijn ghecoren

 

Met ghemeenen ^araet

 

Also ^bdaer breeder staet

 

Dus vrienden wilt hier naer hooren.

 

De Gemeente, seyt Paulus sal toe sien

 

Om ^cMannen van goeden verstande

 

En die salmen die ander Dienaers aenbien

 

Om t'oplegghen der handen

 

So zyse vinden ydoon

 

Totter ^dLeere schoon

 

So salmense dienen laten

 

Maer niemant, hoort t'bediet

 

En ^esal heerschen niet

 

Over den anderen, wilt dit vaten.

 

Oorlof, ende hout dit voor een les

 

Die hier Ghemeynte willen regeeren

 

Want dit de rechte Reghel es

 

Maer wilt oock in al u hanteeren

 

De liefde ^fniet laten naer

 

En als daer is wat swaer

 

Van twistighen dinghen te spreken

 

Roept ^gde Ghemeynte tsaem

 

So draechdy u rechte naem

 

En sult ^hbeteren vele ghebreken.

God werckt den wille, &c.

y Acto.6.2.

z Ezec.44.3.

a Titi.1.5.

b Acto.6.3.

c Acto.6.4.

d 1.Tim.5.22
1.Tim.4.10.

e 1.Tim.5.1.
1.Thes.2.7.

f Rom.12.7.
1.Cor.13.3.

g Acto.15.6.

h Acto.15.20