|
| |
| |
| |
- CXXXVII - [Hoort, die u een broeder laet noemen // hier]
Hoort, die u een broeder laet noemen // hier,
en een lidt van Christus leden wilt wesen,
die u der genade Godts, doert beroemen // fier,
die hy, doer virige lieffde gepresen,
u getoont heeft, waer doer ghy syt ghenesen
des eeuwichs doots ancxt, die u was aenstaende fel;
gaet in u herte & overdinckt by desen,
oft ghy de broederlycke liefde hebt wel.
Neen, ghy, ten sy duer de rechte wercken snel,
die ons dappostelsche leere claerlyck ontdeckt;
dats uwen broeder bystaen & hem voer gequel
behoeden ter noot, als hem tegenspoet weckt;
niet metten wille, maer metter daet, perfeckt,
ombeveyst sonder tsoeken sweirels loff present;
want Schriftuer & redene seyt onbevlekt:
aen de wercken men broederlycke liefde kent.
| |
| |
Drie wercken Thobias synen sonen leert //, siet,
daer broederlycke liefde aen is bevonden,
als hy seyt: myn kint, u oogen doch en keert // niet
van uwen naesten, maer helpt hem tallen stonden;
deylt hem u broot, cleedt hem, geneest syn wonden.
In als, metter daet, toont u jonste crachtich,
want wat is de liefde alsment wilt duergronden,
daer de wercken niet by en blycken eendrachtich,
oft ghy schoon hebt een geneycht herte warachtich,
& de daet, die ghy macht hebt, laet in u sterven?
Serteyn, tis niet: de liefde blyft onmachtich;
die broederschap, die Godt meent, doedy aff kerven;
maer wildy met Christo u erfdeel erven?
Soo volcht des Samaritaens exempel jent;
want naer recht, om uws salicheyts verwerven,
aen de wercken men broederlycke liefde kent.
Tis waer; de broederlycke liefde moet doot // syn
sonder de wercken, tstaet soo geschreven.
Daerom spreckt Johannes, doer Godts geest devoot // fyn:
wie daer seyt dat hy heeft de liefde verheven,
& synen broeder sonder bystant laet leven
in armoede, dats eene die de waerheyt spaert.
| |
| |
Dus op dat hem elck tot de wercken sou geven,
heeft ons Christus syn oordeel te voren verclaert,
dat hy wysen sal, ten lesten dage vermaert,
alleen slaende op de broederlycke wercken.
Daer de liefde des naesten doer wordt bewaert,
soomen redelyc wt syn woorden can mercken,
oock geen opinien noch puntkens clercken
hier tegen in mogen, hoement keert oft went.
Die synen naesten mint, sal hem hier toe stercken:
aen de wercken men broederlycke liefde kent.
Ghy, uwen broeder lieff, nae Godts woort // soet,
soo sult ghy dat metten wercken bewysen saen;
siet ghy hem opden omwech, met een accoort // goet,
sult gy hem den pat wysen daer hy in moet gaen;
siet ghy hem cranck, druckich in wanhopen belaen,
ghy sult hem troosten met Godts bermherticheden,
oft wordt hem tegen recht ongelyck gedaen,
pacientich sult ghy hem stellen te vreden.
| |
| |
In wat tribulatie hy wordt bestreden,
sult ghy hem nae u vermogen bystant toonen
& minnelyck aensien die broederlycke seden
die Christus aen u dede om u te croonen,
bewarende tgebodt daer Godt nae sal loonen:
uwen broeder mint als u selven excellent.
Ick en cans met Schriftuere niet badt verschoonen:
aen de wercken men broederlycke liefde kent.
|
|
Auteursrechtvrij