|
| |
| |
| |
- CXXXIII - [Doen Maria den sone Godts hadde ontfaen]
Doen Maria den sone Godts hadde ontfaen,
is sy tot Elisabeth, haer nichte, gegaen,
die sy bevrucht vant, boven naturen gewrocht;
want dat teecken hadde haer den engel gedaen.
Daerom synse salich, die int geloove staen;
want tgeen dat haer Godt toeseyt, sal worden volbrocht.
Dus vinden wy Maria ootmoedich bedocht;
daer sy spreckt: Myn siel, maeckt groot den Heere
& mynen gheeft heeft hem hooge verhuecht, gecnocht
in Godt mynen salichmaker, van hooger eere;
want hy heeft gesien op die cleynheyt seere
van synder dienstmaecht, hier tallen stonden.
Dus laet ons nu dit ontfangen tonser leere;
want een verneert herte wordt van Godt gevonden,
& eenen morwen gheeft, nae Davidts vermonden,
die en sal Godt nimmermeer versmaden,
om dat hy niet en socht Godts macht te vergronden:
want wie Godts woort geloost, het sal hem versaden.
| |
| |
Maria die stont heel vast in Godts behagen;
want dwoort is vlees worden in huer, thueren dagen.
Sy was vol gratien, een bloeme der bloemen;
want sy heeft alle ons salicheyt gedragen,
daer wy doer behoet syn van deeuwige plagen.
Siet, naer dien tyt, sullen huer salich noemen
alle geslachten, boven der Joden roemen
die Christum alleen verwachten, thueren verschyne;
want Godt en wilt Grieck noch Heyden verdoemen,
maer sy sullen alle geroepen syn ten syne.
Hier om heeft Godt, ten selven termyne,
aen huer groote dingen gedaen, die daer // is
machtich, & synen naem is crachtich, & syne
bermherticheyt duert van geslachten, dwelck waer // is,
tot geslachten, den genen die hem, soot claer // is,
vreesen & loven hem van synder genaden,
& dien wilt Godt verlichten dat huer te swaer // is:
want wie Godts woort gelooft, het sal hem versaden.
Godt heeft cracht duer synen erm gegeven;
want sulcke willen naer huer selffs wysheyt leven,
soo heeft Godt, die daer verhooveerdigen verstroeyt
in huer gedachten, haerder herten verheven;
| |
| |
want daer duer syn sy van Godt verdreven,
om dat sy huer op swets wercken hebben vermooyt.
Soo heeft Godt de schynende machticheyt gedooyt
& heeftse van hueren stoele verstooten.
Maer, die haer hebben in Gods genade gecooyt,
die heeft Godt in huer stede willen vergrooten,
& heeftse verheven als conincx genooten,
die daer ootmoedich syn in hueren gheest,
gelyc den publicaen en doerst niet blooten
syn aenschyn voer den Heere, maer was bevreest,
en den phariseen, die hem verhieff aldermeest,
die ginck van Godt sonder syn misdaet tontladen.
Soo betrout vast in Godts bermherticheyts geest:
want wie Godts woort gelooft, het sal hem versaden.
Die daer hongeren nae de gerechticheyt,
die sullen worden in Godts kennisse geweydt;
want Godt heeft den hongerigen vervult
met goeden spyse, soe de Schrift ons seyt;
want Godt heeft den hemel voor haer bereyt
Ist dat ghyt gelooft, syn rycke besitten sult
| |
| |
duer syn gratie, niet wt rechter schult.
Heet hyse salich, tsy wt wat nacien
dat sy syn, hy heeftse al tsamen gehult,
sonder die opden rycdom staen in huer spacien,
die en verwachten niet Godts rycke gracien;
soo heeft Godt ledich gelaten den rycken.
Maer die nae Godts ryck stellen haer fondacien,
en sullen om sweirels goet van Godt niet wycken;
want men en mach deeuwich goet niet gelycken
by dat verganckelyc is, wee der sielen schaden.
Dus volduert Godt, die en sal u niet beswycken;
want wie Godts woort gelooft, het sal hem versaden,
Godt heeft der bermherticheyt geweest gedachtich,
die hy Adam heeft toegeseyt seer machtich,
soo dat hy thoot vant serpent sou vertreden.
En die dit geloofden in huer herte sachtich,
die waren altyt syn gracien verwachtich,
en hebben haer pacientich geleden
| |
| |
tot Abraham toe, vol geloovicheden;
want in syn saet soude worden gebenendyt
alle menschen van gelooviger seden,
en duer Godt wt dienen al haren tyt.
Want de Schriftuere niet alleene en belydt
dat alle Israhelyten syn wt der natueren,
maer die in Godts geloove staen, hoe breet ost wyt,
datse wesen sullen duer Christus gebrueren;
want dit is tsaet daer de Schriften aff rueren.
Van Israhel dus hout u in sgelooffs paden,
oft ghy hout Godt luegenachtich talder hueren:
want wie Godts woort gelooft, het sal hem versaden.
|
|
Auteursrechtvrij