Nieu Aemstelredams Liedboek

Op de wijse, Die lustelijcke Mey.

ADieu mijn troost mijn toeverlaet
Godt hoed' v doch voor schande,
Adieu, want door mijn vrienden raedt
Moet ick nu wt den lande
Gaen doolen Liefgen achter dijck,
Tot dat ick com' in Oostenrijck,
Wilt somtijts om my peysen,
Adieu, ick moet verreysen.

Adieu dien ick van harten min

Wy twee wy moeten scheyden,

[fol. 128]

 

Adieu een wijl teghen mijn sin,

 

Wy sullen moeten beyden

 

Tot dat t'gheluck eens omme slaet

 

Dat my dus crachtich teghen staet,

 

Dat ick weer mach in eeren

 

Met v mijn lief verkeeren.

 

Doen ick eerstmael Lief by v was

 

Meend' ick vreuchd' te verwerven,

 

V woorden soet op t'selve pas

 

Deden mijn droefheyt sterven,

 

Maer groot verdriet, comt haestich voort

 

En werpt mijn vreuchd' gantsch overboort

 

Nu ick van v moet wesen,

 

Adieu lief wtghelesen.

 

Adieu mijn lust Cathuysers Hof

 

Daer ick placht in te coomen,

 

Adieu Fick met v bloemen grof

 

End' Annitgen met v roomen,

 

Adieu groen, met v bier en Wijn

 

Adieu Reguliers Clooster fijn,

 

Adieu Neeltgen by't hecke,

 

Adieu want ick vertrecke.

 

Adieu vermaerde Warmoestraet

 

Daer sy mijn jongst ontmoette,

 

Met een speelnootgen t'savonts laet

 

Doen ick haer lieflijck groette,

 

Wy waren vrolijck ende bly,

 

Wy ginghen t'samen zijd' aen zy

 

Tot middernacht spaceeren,

 

T'was mijn end' haer begheeren.

 

Adieu o stoep van steenen claer

 

Daer ick mijn Lief eerst vonde,

 

Adieu plaets daer ick vrolijck waer

 

Doen sy mijn harte wonde,

 

Adieu huys daer ick haer perfeckt

 

Mijn liefd' met reden heb ontdeckt,

 

Adieu hart daert my luste

 

Dat ick haer mondeken custe.

 

Adieu Brug daer mijn Lief op sat

 

Doen ick dit ginck verbreyen,

 

Adieu deur, dies' in d'handen hadt

 

Als ick van haer moest scheyen,

 

Adieu Vryers en Dochters teer

 

Die my niet gunt dan deucht end' eer,

 

Nae Oostlandt moet ick varen

 

Adieu Lief over twee Jaren.