Nieu Aemstelredams Liedboek

Op de wijse: Alst begint.

UVt liefden siet // lijd' ick verdriet,
Ick en macht nu niet // wtspreken
hoe dat sy hiet, die mijn hart doorschiet
T'welck Venus heeft deursteken.

Noyt smart soo groot // als desen doot,

Wie sou den cloot, gheraken,
Reyn roosken root // troost my t'is noot

[fol. 121]

 

Eer ick den doot sal smaken.

 

Ick ben deurwont, zijt dies oorcont

 

In s'hartsen gront // met lijden,

 

Nochtans haer mont, haer Borstkens ront

 

Connen my terstont verblijden.

 

In sweerelts troon, door haren toon

 

Spant sy die croon // der vrouwen,

 

In desen hoon, haer dienaers loon,

 

Wie sou de schoon, betrouwen.

 

Liefs woorden soet, voor ghelt of goet,

 

Want Lief by Lief moet, blijven,

 

Noch gint men hoet // dat troosten moet

 

T'welck liefde doet verdrijven.

 

Maer dees Kerssou, daer ick op bou

 

Is by gheen vrou, te ghelijcken,

 

Derf ickse nou, ick sterf van rou,

 

Schoon Lief v trou, moet blijcken.

 

Laet hope mijn, vertrooster zijn

 

Schoon Roosemarijn, ghepresen,

 

Gheeft medecijn, eer ick verdwijn

 

Soo is mijn pijn, ghenesen.

 

Maer weyghert zijt, gheen meerder spijt

 

Mijn hart dat splijt, deurt derven:

 

Vermaledijt, zy ure of tijdt

 

Ick roep en crijt, om sterven.

 

Eerst haer behaecht, eer ghy liefd' draecht

 

Haer sin ghevraecht, met smeken

 

Ick hebt ghewaecht, t'zy Godt gheclaecht,

 

Dus hoort die maecht, eerst spreken.

 

Loopt niet verblint, al teghen wint,

 

Oock niet en mint, nae ooghen

 

Maer wel versint, eer ghy begint

 

Of ghy vint, v bedrooghen.

 

Met oorlof reyn, siet in't ghemeyn

 

Ick blijf alleyn, in smarte,

 

Ick prijs dat greyn, in sWeerelts pleyn

 

Sy blijft certeyn, in't harte.

 

Sy is eerbaer, haer oochskens claer

 

Al sonder maer, gheschepen.

 

Een ure van haer, is duysent Jaer,

 

Het block valt swaer, te slepen.