Nieu Aemstelredams Liedboek

Op de wijse: Alst begint.

U Liefde quelt my tot der doot
O edel schoon Goddinne,
Verlicht v dienaers lijden groot
Eer dat ick heel ontsinne,
En vergae door v minne.

Eer ick v oyt met ooghen aensach

Maer dan v hoorde spreken,
Des heeft Venus den selven dach
My met v liefd' ontsteken,
Ist met Liefken een groot teken.

Hoe cont ghy lief die om v gaet,

Zijn vleesch en bloedt verteeren,
V troost onthouden vroech of laet
En v ooch van hem keeren,
Die v op eer gaet begheeren.

V eerbaer wesen schijnt lief niet

Te zijn soo straf van natueren,
Maer goedertier dus my verdriet,
Wilt blussen al mijn trueren,
Of de doot sal ick besueren.

Reyn suyvere Princesse goet

Mocht ick soo gheluckich wesen,
V te crijghen, soo sou mijn moet
Van veel drucx zijn ghenesen,
Ontfermt my Lief door desen.