Nieu Aemstelredams Liedboek


Op de wijse: Schoon liefken loyale. SChoon liefken playsant Ghy zijt mijn lief alleyne Mijn hart vyerich brandt Om uwer liefden reyn Suyvere Fonteyn, Laeft mijn dorstich ghemoet Dat altijdt jaecht, heel onvertsaecht Nae troost van v liefde soet. Laet ick Lief ontfaen Van v een troostelijck woort, So sal zijn gedaen, mijn treuren rechte voort Druc blijft versmoort, Als ic lieflic aenschou V deuchde fijn, O liefste mijn Weest my doch me ghetrou. Eerbaer liefken jent Ghy spant in't hart de Croon En zijt excellent // Boven Helena schoon, Edel van persoon, Zijt ghy voorwaer gheset Al in mijn hart, Vry sonder smart Als een spieghel net. Laet trou zijn gheloont Met trou alst wel betaemt, Want ghy Liefken woont In mijn hart ongheblaemt: Laet niet beschaemt, V dienaer t'elcker uer, Die v bemint, O Venus kint, Van goeder harten puer. Lief doch niet en acht, Dees nijders valsche praet, Want sy dach en nacht Vseren niet dan quaet, Met twist en haet Zijn sy altijdt ghequelt, Dus lief doch, Haer vals bedroch Bezijden zy ghestelt. Princesse eerbaer, Maeckt v dienaer verblijt Die v mint voorwaer, Op trou en eer altijdt, Troostbarich zijt Reyn bloemken goedertier So wort verheucht, Mijn jonghe jeucht
[Folio 108]
Door v soet bestier.