Nieu Aemstelredams Liedboek

Op de wijse, Pour vn playsier.

SChoon Lief ghy zijt mijn troost alleyne
Vercoren boven al, Vercoren, etc.
Ghy spijst Ziel en lijf in't gemeyne
Hier in dit Aerdtsche dal, hier in, etc.
Dese nijders geschal, met hare boose treken,
Sy beletten my mijn Lief te spreken, sy, etc.
T'welck ick my wel beclaghen sal.

Schoon lief wat soudt my moghen baten

Ter weerelt menich pont, ter weerelt, etc.
En ick v dan sou moeten laten,
So waer ick gants doorwont, soo waer, etc.
In mijns Liefs rooder mondt,
Is noyt bedroch ghevonden
Dat mach ick liefken wel oorconden, etc.

[fol. 106]

 

Alst v belieft maeckt my ghesont.

 

Schriftuere lief, is uwen name,

 

Al wort ghy seer benijt, al wort, etc.

 

T'onrecht soud' ick't my moghen schame,

 

Want ghy die liefste zijt, want ghy, etc.

 

En sonder v jolijt,

 

Wat sal ick gaen beginnen,

 

Helpt my schoon lief den strijt gewinnen, etc.

 

In desen mijnen strijdt.

 

Schoon lief ghy hadt my wtvercoren,

 

Al eer ick v vercoos, al eer ick, etc.

 

Ghy socht my daer ick was verloren

 

Daer ick lach troosteloos, daer ick lach, etc.

 

Alle mijn wonden boos

 

Hebt ghy gheheel ghenesen,

 

Met Wijn en Olie ghepresen, etc.

 

Dies ick v lief voor een ander vercoos.