Nieu Aemstelredams Liedboek
(1591)–Anoniem Nieu Aemstelredams Liedboek–
[Folio 105]
| |
Troost my schoon lief t'is noot
In desen swaren aenstoot,
Want ghy cont my doch helpen,
Het lijden en commer stelpen
Door v ghenade bloot.
Wilt hem ghenade gheven, Die v bemint voorwaer,
Want in mijn hart verheven
Staet ghy lief en gheen aer,
Deur v bruyn ooghen claer, En oock v geele hayr
Waer ick in heb behaghen,
En wilt om v al waghen
Lijf, goet, t'valt my niet swaer.
Och lief weest niet als steene
Verhart in uwen gront,
Maer hoort doch mijn gheweene,
Schoon lief maeckt my ghesont,
Want v schoon rooder mont, En v borstkens ront
Die doen my t'hart verblijden,
Waer deur ick stel bezijden
Alle droefheyt tot deser stont.
Oorlof Princesse ghepresen
Wilt doch ghedachtich zijn
Vwen dienaer midts desen,
Die ghy aen doet groote pijn,
En acht gheen nijders fenijn,
Schoon lief schoon in't aenschijn,
Want sy zijn vals van binnen,
En maeckt twist en onminnen,
Daer twee goe liefkens te samen zijn.
|
|