Nieu Aemstelredams Liedboek


Op de wijse: Adieu reyn bloem rosiere. SChoon bloemken wtghelesen Aenhoort mijn claghen groot, Van v can ick niet wesen, My dunckt ick sterf den doot,
[Folio 105]
Troost my schoon lief t'is noot In desen swaren aenstoot, Want ghy cont my doch helpen, Het lijden en commer stelpen Door v ghenade bloot. Wilt hem ghenade gheven, Die v bemint voorwaer, Want in mijn hart verheven Staet ghy lief en gheen aer, Deur v bruyn ooghen claer, En oock v geele hayr Waer ick in heb behaghen, En wilt om v al waghen Lijf, goet, t'valt my niet swaer. Och lief weest niet als steene Verhart in uwen gront, Maer hoort doch mijn gheweene, Schoon lief maeckt my ghesont, Want v schoon rooder mont, En v borstkens ront Die doen my t'hart verblijden, Waer deur ick stel bezijden Alle droefheyt tot deser stont. Oorlof Princesse ghepresen Wilt doch ghedachtich zijn Vwen dienaer midts desen, Die ghy aen doet groote pijn, En acht gheen nijders fenijn, Schoon lief schoon in't aenschijn, Want sy zijn vals van binnen, En maeckt twist en onminnen, Daer twee goe liefkens te samen zijn.