Nieu Aemstelredams Liedboek

Op de wijse. Mijn Godt voet my, als een Herder etc.

OVerpeynsen bedroeft het hart van binnen
Ghestadich ghepeyns laet my gheen troost ghewinnen
Nacht ende dach blijf ick by v ghestadich
Die my verquick wt liefden soet ghenadich
Ghy zijt alleen die mijn smart can ghenesen
Niet meer en sal liever int harte wesen.

Als t'hart beswijckt door liefde menigherhande

Den gheest verheucht, den vreucht wt Venus bande
Zeer amoureus ghedaelt wt shemels troone
In eerbaerheyt spant sy der vrouwen croone
Die liefd' verwint, Rethorijca moetse prijsen
Ick sal haer deucht, trou en eer bewijsen.

Int hart alleen zijt ghy Princes vercoren

Weest heus en trou, hy heeft v trou ghesworen
Spijt nijders quaet, die altijt quaet hantieren
Peyst die Fortuyn, sy can wel haest verkeeren
Elc een zijn tijt, so lang men leeft op aerden
Rijckdom voor lieft, acht ick van gheender waerden.