Nieu Aemstelredams Liedboek

Op de wijse: Alst begint.

O Roosgen root // o peerle jent
Liefgen minioot // daer ick om lijd' torment,
Schoone Godinne ick blijf geschent,
Want mijn lijden is sonder ent,
Nacht ende dach, doe ick geclach, voorwaer,
Om dat ick scheyd' van v, o maecht eerbaer.

Moet ick nu scheyden // ist nu den tijt

Sonder verbeyden // ofte respijt
Mijn hart van droefheyt // int lichaem splijt
Mijn oochskens ick in sticken crijt
O scheyden fel // die in mijn ghequel // doet aen,
Ken weet hoe dat icket sal connen bestaen.

O wreede dach // ongheluckighe uer,

Dien ick oyt sach // ende ghy valt my so suer
Want t'dunct my te zijn tegen natuer,
Dat ick nu moet o maechdeken puer,
Segghen adieu // op een nieu // ick blijf in rou
O bittere doot waer na soo beydy nou.

Princesse schoone // dit wel versint

Ghy spant die croone // en zijt bemint,

[fol. 101]

 

Want ick ben niet ghelijck den wint,

 

Ghy staet altijt int harte gheprint

 

Ick sal ghetrou // o schoon kersou // nu zijn,

 

Al valt my t'scheyden alsoo groote pijn.