Nieu Aemstelredams Liedboek


Een nieu Liedeken. MOcht ick gheluck verwerven Al nae mijn shartsen sin, Mijn Liefken soud' ick erven Die ick in't hart bemin, Sonder eenich cesseren Soud' ick my tot haer keeren Door liefde soet // die sy my vraghen doet. Als ick eerst haer aenschoude Niet kennende haren Naem, Mijn bloedt gheheel vercoude, Vol drucx was mijn lichaem, Ick dacht tot gheene stonden Is haer schoonheyt omgronden Het docht my claer, onmogelijck voorwaer. Ick moet haer schoonheyt prijsen, Want sy is prijsens waert, so ic v sal bewijsen, Met deucht is sy vermaert, Hoocheyt acht sy voor schande, Cloeck is sy van verstande, Fraey van manier // daer toe van wesen fier.
[Folio 97]
Van aenschijn is sy schoone Van Leden wel volmact, met Venus inden troone Mijn lief in schoonheyt blackt Haer kele singt musijcke, haer tonghe spreckt rethorijcke lieflic daer by, van wesen altijt bly. Boven Sara verheven, is sy heel obedient Susannas eerbaer leven // heeft sy int hart geprent Tot deuchden goedertierich In liefden is sy vierich Eer en deucht, heeft sy int hart gheveucht. Troost my Princes o vrouwe, Pleecht der liefden bevel, slaet van myn hart dees rouwe Aensiet mijn groot ghequel Rijst doch wt nijders rade In v laet zijn ghenade Eert lief bedacht // want reyne liefde baert cracht.